काठमाडौँ ।

 मानव अधिकार तथा शान्ति समाजको प्रतिनिधिमण्डलले मंगलबार राष्ट्रपति रामचन्द्र पौडेललाई भेटेर जलवायु न्यायसम्बन्धी अभियानबारे अवगत गराएको छ ।

समाजले १७ वर्षदेखि जलवायु परिवर्तन, विश्वव्यापी उष्णता र त्यसका प्रभावबारे सचेतना अभियान सञ्चालन गर्दै आएको छ । पछिल्लो चरणमा जीवनचक्र परिस्थिति सन्तुलन र अहिंसात्मक जीवन धारालाई संविधानको प्रस्तावनामा समावेश गर्न आग्रह गर्दै चैत १७ गतेदेखि जलवायु न्याय केन्द्रित विशेष अभियान सञ्चालन गरिरहेको छ ।

राष्ट्रपतिको कार्यालय, महाराजगञ्ज, काठमाडौंमा भएको भेटमा प्रतिनिधिमण्डलले भविष्यमा संविधान संशोधनका क्रममा यसलाई समावेश गर्नुपर्नेमा ध्यानाकर्षण गराएको थियो । संविधान संशोधन निरन्तर प्रक्रिया भएकाले नागरिक सर्वोच्चताको आधारमा लोकतान्त्रिक गणतन्त्र नेपाललाई थप सशक्त बनाउनुपर्ने समाजको धारणा थियो ।

प्रतिनिधिमण्डलमा संस्थापक सभापति कृष्ण पहाडी, सभापति रेनुका पौडेल, निवर्तमान सभापति रामकृष्ण बराल, पूर्व सभापतिहरू होमकान्त चौलागाईं र डा. गङ्गाधर अधिकारी, सल्लाहकार रामप्रसाद जोशी, कोषाध्यक्ष चन्द्रमणि बन्जारा, वाग्मती प्रदेश सचिव दिवाकर पुडासैनी, सदस्यता अपिल समिति संयोजक किरण ढकाल, केन्द्रीय सदस्यहरू नम्रता खरेल, उमा गौतम, मणिराम दाहाल, रुपा पुडासैनी र रोजिना विष्ट सहभागी थिए ।