काठमाडौं ।
उपप्रधानमन्त्री एवं अर्थमन्त्री विष्णुप्रसाद पौडेलले आगामी आर्थिक वर्ष २०८२/८३ को बजेट निर्माण गर्दा लोकप्रियताको पछि लाग्ने प्रवृत्तिबाट बाहिर निस्कन आवश्यक रहेको बताएका छन्।
श्रम, रोजगार तथा सामाजिक मन्त्रालयसँगको छलफलमा उनले बजेट वितरणमुखी भन्दा यथार्थपरक र कार्यान्वयन योग्य कार्यक्रम तथा योजनाहरू आवश्यक रहेको बताए। उनले श्रम, सिप, रोजगारी र उत्पादनलाई प्राथमिकता दिनुपर्नेमा जोड दिँदै वितरणमुखी योजनाले मात्र दीर्घकालीन लाभ दिन नसक्ने बताए।
सामाजिक सुरक्षासँग जोडिएका कार्यक्रमहरूको गम्भीर समीक्षा गर्नुपर्ने उनको भनाइ थियो। उनले विभिन्न मन्त्रालय र निकायहरूसँग भएका समान प्रकृतिका कार्यक्रमहरूलाई एकीकृत गर्न आवश्यक रहेको उल्लेख गरे।
श्रममन्त्री शरतसिंह भण्डारीले रेमिट्यान्सलाई व्यवस्थित गर्नुपर्ने बताउँदै वैदेशिक रोजगारबाट फर्किएकाहरूको सीपको सदुपयोग गर्दै आन्तरिक रोजगारी सिर्जनामा जोड दिनुपर्ने बताए।
राष्ट्रिय योजना आयोगका सदस्य डा. प्रकाशकुमार श्रेष्ठले प्रधानमन्त्री रोजगार कार्यक्रमको पुनरवलोकन गरी अघि बढ्नुपर्ने धारणा राखे। अर्थ सचिव घनश्याम उपाध्यायले सिप विकासलाई प्राथमिकतामा राख्नुपर्नेमा जोड दिए।
हाल अर्थ मन्त्रालयले नयाँ बजेटबारे विभागीय मन्त्रालयहरूसँग छलफल गरिरहेको छ।
