काठमाडौं ।

 मधेश प्रदेश प्रमुख सुमित्रा सुवेदी भण्डारीले प्रदेशसभाबाट पारित भई प्रमाणीकरणका लागि पेश गरिएका तीन महत्वपूर्ण विधेयक प्रमाणीकरण गरेकी छिन्।

आज प्रमाणीकरण गरिएका विधेयकहरूमा मधेशमा पर्यटनको विकास र प्रवर्द्धन गर्ने सम्बन्धमा व्यवस्था गर्न बनेको विधेयक, प्रदेश कृषि विकास सम्बन्धमा व्यवस्था गर्न बनेको विधेयक, र प्रदेश बालअधिकारसम्बन्धी ऐन, २०७७ लाई संशोधन गर्न बनेको विधेयक रहेका छन्।

नेपालको संविधानको धारा २०१ को उपधारा (२) अनुसार प्रमाणीकरण गरिएका यी विधेयकहरू प्रदेश विकासका लागि महत्त्वपूर्ण मानिएका छन्।

पर्यटन प्रवर्द्धन विधेयकले मधेश प्रदेशमा पर्यटन विकासका लागि नीति तथा योजना तय गर्नेछ। कृषि विकास विधेयकले कृषि क्षेत्रमा नवप्रवर्तन, आधुनिकीकरण तथा कृषकको हित संरक्षण गर्ने कानूनी आधार तयार गर्नेछ। बालअधिकार संशोधन विधेयकले बालअधिकार संरक्षणलाई अझ प्रभावकारी बनाउन कानूनी परिमार्जन गर्नेछ।

प्रदेश प्रमुखको कार्यालयका प्रवक्ता शत्रुधन यादवका अनुसार यी विधेयकहरूको कार्यान्वयनले मधेश प्रदेशको सामाजिक, आर्थिक र पर्यटकीय क्षेत्रमा सकारात्मक प्रभाव पार्ने अपेक्षा गरिएको छ।