स्वास्थ्य तथा जनसंख्या मन्त्री प्रदीप पौडेलले स्वास्थ्य क्षेत्रको बजेट समयमै खर्च गर्ने वातावरण बनाउन सक्रियता देखाएका छन्।
मन्त्रालयअन्तर्गतका विभिन्न महाशाखा तथा केन्द्रहरूलाई मन्त्रालयमा बोलाएर उनले समय बाँकी छँदै अधिकतम प्रगति देखिने गरी काम गर्न निर्देशन दिएका छन्। नियमित बैठकमार्फत कार्य प्रगतिबारे जानकारी लिइरहेका मन्त्री पौडेलले मंगलबार प्रगति कमजोर देखिएका महाशाखा तथा केन्द्रहरूलाई लक्ष्यअनुसार काम गर्न सजग गराएका छन्।
मन्त्री पौडेलले दातृ निकायहरूबाट बजेट कटौतीका समस्यालाई समाधान गर्न स्रोतको अधिकतम उपयोग गर्नुपर्ने बताए। “समस्या देखाउनु मात्र होइन, समाधान निकाल्नु पनि आवश्यक छ,” उनले भने।
उनले चालु आर्थिक वर्षको बजेट कार्यान्वयनमा तीव्रता दिँदै बाँकी चार महिनाको समय सदुपयोग गरी परिणाममुखी नतिजा निकाल्न विभागीय प्रमुखहरूलाई आग्रह गरे। “हामीसँग स्रोत छ, तर कार्यान्वयन सोचअनुसार हुन सकेको छैन। त्यसैले अब परिणाममुखी काममा ध्यान दिनुहोस्,” मन्त्री पौडेलले भने।
परम्परागत कार्यशैली परिवर्तन गरी नयाँ सोच र नवीनतम उपायहरू अवलम्बन गर्नुपर्ने भन्दै उनले स्वास्थ्य क्षेत्रका आवश्यक नीतिगत सुधारमा सरकार सहयोग गर्न तयार रहेको बताए। “तपाईंहरूको काम प्रभावकारी बनाउन नीतिगत सुधार आवश्यक छ भने भन्नुहोस्, हामी हरसम्भव प्रयास गर्नेछौं,” उनले आश्वासन दिए।
स्वास्थ्य क्षेत्रमा दातृ निकायहरूको बजेट कटौतीले ल्याएका समस्याहरूलाई सम्बोधन गर्न सरकारले आवश्यक वैकल्पिक व्यवस्था मिलाउने प्रतिबद्धता मन्त्री पौडेलले जनाए
