काठमाडौं ।

प्रधानमन्त्री केपी शर्मा ओली बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक) को छैटौं शिखर सम्मेलनमा भाग लिन तथा औपचारिक भ्रमणका क्रममा मंगलबार साँझ थाइल्यान्डको राजधानी बैंकक पुगेका छन्।

प्रधानमन्त्री ओलीलाई बैंककस्थित सुवर्णभूमि अन्तर्राष्ट्रिय विमानस्थलमा थाइल्यान्डका उपप्रधानमन्त्री एवं यातायातमन्त्री सुरिया जङ्ग्राउनग्रेङकिट दम्पती, संस्कृति तथा खेलकुदमन्त्री सोरावोङ थेनबोङ दम्पती, थाइल्यान्डका लागि नेपाली राजदूत धनबहादुर वली तथा नेपालका लागि थाइल्यान्डका राजदूत सावापोङ सिरिसोर्नले स्वागत गरेका थिए।

यो नेपालका प्रधानमन्त्रीबाट थाइल्यान्डको पहिलो औपचारिक भ्रमण हो, जुन थाइल्यान्डका प्रधानमन्त्री पे थोङ् थान् शिनावातको मैत्रीपूर्ण निमन्त्रणामा सम्पन्न हुँदैछ।

प्रधानमन्त्री ओलीको भ्रमण टोलीमा प्रथम महिला राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक–विकास सल्लाहकार डा. युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईलगायत उच्चस्तरीय पदाधिकारीहरू सहभागी छन्।