काठमाडौं ।

प्रधानमन्त्रीको समेत जिम्मेवारी सम्हालेका उपप्रधान एवं शहरी विकासमन्त्री प्रकाशमान सिंहले कीर्तिपुरमा निर्माणाधीन ‘क्रिकेट स्टेडियम’ को सिंहदरबारस्थित आफ्नै कार्यकक्षबाट निरीक्षण गरेका छन्।

शहरी विकास मन्त्रालयको सिंहदरबारस्थित कार्यकक्षबाटै उनले नियमित रूपमा निरीक्षण गर्ने व्यवस्था मिलाएको छ। निर्माण कार्यलाई तोकिएको समयमै सम्पन्न गर्न आठ घण्टाका दरले तीन सिफ्टमा काम भइरहेको जानकारी दिइएको छ।

उपप्रधानमन्त्री सिंहले निर्धारित समयमै निर्माण कार्य सम्पन्न गर्नका लागि कामको गति तीव्र पार्न निर्देशन दिएका छन्। उनले निर्माण कार्यलाई प्रभावकारी बनाउन उचित व्यवस्थापन गर्नुपर्नेमा जोड दिए।

शहरी विकास मन्त्रालयअन्तर्गत सङ्घीय सचिवालय निर्माण तथा व्यवस्थापन कार्यालयले अन्तर्राष्ट्रिय मापदण्डअनुसार कीर्तिपुर क्रिकेट मैदानमा प्याराफिट निर्माण र फ्लडलाइट जडानको लागि गत फागुनमा सम्झौता गरेको थियो। उक्त निर्माण कार्य आगामी वैशाख २४ गतेभित्र सम्पन्न गर्ने लक्ष्यसहित अघि बढाइएको छ।

शहरी विकास मन्त्रालयका सचिव गोपाल सिग्देलले मन्त्रालयबाट नियमित रूपमा निर्माण कार्यको निरीक्षण हुने बताए। उनले भने, ‘आजदेखि मन्त्रीज्यूले सिंहदरबारबाटै कीर्तिपुरको कामको निरीक्षण गर्नुहुन्छ। निर्धारित समयमै निर्माण सक्न मन्त्रालय प्रतिबद्ध छ।’

यसअघि, गत चैत ७ गते उपप्रधानमन्त्री सिंहले कीर्तिपुरमै पुगेर निर्माण कार्यको अवलोकन गरेका थिए। मन्त्रालयका अनुसार १० हजार क्षमताको प्याराफिट निर्माण कार्य वैशाख २४ गतेभित्र सम्पन्न गर्ने लक्ष्यसहित काम तीव्र रूपमा भइरहेको छ।