बागलुङ ।

चैते दसैँ सुरु भएसँगै बागलुङस्थित कालिका मन्दिरमा भक्तजनको घुइँचो लाग्न थालेको छ। आइतबारदेखि नवरात्र सुरु भएसँगै दुर्गा भवानीको पूजा आराधना गरिँदै आएको छ। विशेष गरी बागलुङ कालिका मन्दिरमा हुने पूजापाठ र बलि प्रथाका कारण टाढा–टाढाबाट धार्मिक पर्यटकहरू यहाँ आउने गर्छन्।

चैत नवरात्रका अवसरमा यहाँ पूजा आराधना तथा बलि दिँदा मनोकामना पूरा हुने जनविश्वास रहेको छ। कालिका भगवती गुठी व्यवस्थापन समितिका अध्यक्ष कुमार खड्काका अनुसार चैते दसैँको तेस्रो दिनसम्म दैनिक हजारौँ भक्तजन दर्शन गर्न आइपुगेका छन्। यस वर्ष पाँच लाखभन्दा बढी भक्तजन आउने अनुमान गरिएको छ। भक्तजनको सुविधाका लागि चैत २० गतेदेखि मेला आयोजना गरिएको छ।

खड्काका अनुसार मेलाको व्यवस्थापनका लागि सवारी पार्किङ, सुरक्षा व्यवस्था तथा अन्य आवश्यक सुविधाहरू उपलब्ध गराइएका छन्। मेला सञ्चालनका लागि अनुमानित रु ५५ लाख खर्च हुने अनुमान गरिएको छ। धार्मिक पर्यटनको हिसाबले महत्वपूर्ण मानिने यस मन्दिरमा नेपाल मात्र नभई छिमेकी मुलुक भारतबाट पनि भक्तजन आउने गर्दछन्।

मन्दिरमा बोका, राँगो, कुखुरा लगायतको बलि दिने परम्परा रहेको छ भने शान्तिको प्रतीकस्वरूप परेवा उडाउने गरिन्छ। यस वर्षको मेलामा स्थानीय कला संस्कृति झल्कने झाँकीसमेत प्रस्तुत गरिने छ। साथै, स्थानीय उत्पादन प्रवर्द्धन गर्न डोको, नाङ्लो, ठेका, डालालगायतका सामग्री बिक्रीका लागि निःशुल्क स्टल उपलब्ध गराइएको छ।

चैते दसैँको अवसरमा भक्तजनको ठूलो सहभागिता रहने भएकाले मन्दिर प्रशासन तथा सुरक्षाकर्मीहरू आवश्यक व्यवस्था मिलाउन लागि परेका छन्।