काठमाडौं ।

 प्रधानमन्त्री केपी शर्मा ओलीले वर्तमान सरकार प्रेस तथा अभिव्यक्ति स्वतन्त्रताप्रति पूर्ण निष्ठावान् रहेको बताएका छन्।

सार्वजनिक सेवा प्रसारण संस्था रेडियो नेपालको ७५औँ वार्षिकोत्सवका अवसरमा आज दिएको शुभकामना सन्देशमा उनले प्रेस स्वतन्त्रताप्रतिको सरकारको प्रतिबद्धता व्यवहारसिद्ध रहेको उल्लेख गरे।

प्रधानमन्त्री ओलीले प्रेस जगत्ले राष्ट्रियता, लोकतन्त्र, सुशासन र विकासलाई सहयोग पुग्ने गरी जिम्मेवार भूमिका निर्वाह गर्नुपर्नेमा जोड दिँदै राष्ट्र निर्माणका लागि रेडियो नेपालले महत्त्वपूर्ण भूमिका खेल्ने विश्वास व्यक्त गरे।

‘नेपालको राजनीतिक जागरणमा रेडियो नेपालको ठूलो योगदान रहेको छ। अब यसले देश विकासका निम्ति सृजनात्मक रूपमा आमनागरिकलाई सुसूचित गर्दै रोजगारी सिर्जना र आर्थिक समृद्धिमा केन्द्रित हुनुपर्ने बेला आएको छ,’ प्रधानमन्त्रीको शुभकामना सन्देशमा उल्लेख छ।