बैङकक ।

थाइल्याण्डको औपचारिक भ्रमणमा रहेका प्रधानमन्त्री केपी शर्मा ओली र थाइल्याण्डका प्रधानमन्त्री पेतोङत्रान शिनावात्राबीच आज भेटवार्ता भएको छ।

भेटवार्तामा प्रधानमन्त्री ओलीसँगै परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक विकास सल्लाहकार डा. युवराज खतिवडा, मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईलगायत उच्च अधिकारी सहभागी थिए।

भेटवार्ताअघि प्रधानमन्त्री ओलीलाई थाइल्याण्डको सरकारी भवनमा उनका समकक्षी शिनावात्राले स्वागत गर्दै गार्ड अफ अनर प्रदान गरिएको थियो।

परराष्ट्र मन्त्रालयका अनुसार भेटवार्तापछि संस्कृति र पर्यटन क्षेत्रमा सहकार्यसम्बन्धी सम्झौतापत्रमा हस्ताक्षर हुने छ। त्यस्तै, गैरसरकारी र व्यावसायिक संस्थाबीच छवटा सहमतिपत्र आदान–प्रदान हुने जनाइएको छ।

सम्झौतापछि दुवै प्रधानमन्त्रीले संयुक्त पत्रकार सम्मेलन गर्नेछन्। त्यसपछि प्रधानमन्त्री ओली आफ्नो सम्मानमा आयोजित दिवभोजमा सहभागी हुने कार्यक्रम रहेको छ। प्रधानमन्त्री ओलीले आजै थाइ नरेश महा बजिरालोङकर्नसँग शिष्टाचार भेट गर्ने कार्यक्रम छ।