म्यानमारमा गएको ७.९ म्याग्निच्यूडको विनाशकारी भूकम्पको पाँच दिनपछि एक जनालाई जीवितै उद्धार गरिएको छ। म्यानमारको नेपिडोस्थित एक होटल भवन भत्किएको भग्नावशेषबाट २६ वर्षीय होटल कर्मचारीलाई सुरक्षित निकालिएको राज्य प्रशासन परिषद्को सूचना टोलीले जनाएको छ।
भग्नावशेषमा दुई जना फसेको आशंका गरिएको थियो। म्यानमारको अग्नि सेवा विभाग र टर्कीको उद्धार टोलीको सहकार्यमा तीमध्ये एक जनालाई सुरक्षित उद्धार गरिएको छ।
स्थानीय समयअनुसार मङ्गलबार अपराह्न ३ बजे होटलको अप्रेसन सुरू भएको थियो भने बुधबार बिहान १२:३० बजे उक्त व्यक्तिलाई उद्धार गरिएको हो।
बाँकी फसेका व्यक्तिहरूको खोजी तथा उद्धार कार्य जारी रहेको अधिकारीहरूले जनाएका छन्।
