काठमाडौं ।
विद्यालय शिक्षा ऐन जारी गर्न माग गर्दै शिक्षकहरूले काठमाडौंमा ठूलो र्याली निकालेका छन्।
शिक्षक महासंघको अगुवाइमा काठमाडौंका विभिन्न स्थानबाट निस्किएको र्याली माइतीघर मण्डलामा पुगेर धर्नामा परिणत हुने महासंघले जनाएको छ।
नयाँ चरणको आन्दोलनका लागि देशभरिका शिक्षकहरू बुधबार काठमाडौं आएका हुन्। महासंघका सहअध्यक्ष तथा आन्दोलन परिचालन समितिका संयोजक नानुमाया पराजुलीका अनुसार र्यालीमा करिब डेढ लाख शिक्षक कर्मचारी सहभागी हुनेछन्।
पराजुलीले भनिन्, “शिक्षकहरू काठमाडौं भित्रिसक्नु भएको छ। आज डेढ लाख शिक्षक कर्मचारीको र्याली निस्कन्छ। भोलि थप शिक्षक कर्मचारी सहभागी हुनेछन्।”
आन्दोलनलाई शान्तिपूर्ण बनाउन ८ सय स्वयंसेवक परिचालन गरिएको उनले जानकारी दिइन्। “हाम्रो आन्दोलन शान्तिपूर्ण, अनुशासित र मर्यादित हुनेछ। प्रदेशहरूबाट पनि १००/१०० जना स्वयंसेवक परिचालन गरिएको छ,” उनले भनिन्।
