काठमाडौं ।
प्रधानमन्त्री केपी शर्मा ओलीले आफ्नो थाइल्यान्ड भ्रमणले नेपाल र थाइल्यान्डबीचको सम्बन्ध नयाँ उचाइमा पुगेको बताएका छन्।
थाइल्यान्डको औपचारिक भ्रमणका क्रममा बैंककमा रहेका प्रधानमन्त्री ओलीले थाइल्यान्डका प्रधानमन्त्री पे थोङ् थान् शिनावात्रासँगको भेटवार्तापछि आयोजित संयुक्त पत्रकार सम्मेलनमा यस्तो धारणा राखेका हुन्।
प्रधानमन्त्री ओलीले आफ्नो भ्रमणबाट संस्कृति, पर्यटन, शिक्षा, ऊर्जा लगायतका क्षेत्रमा सहकार्य अभिवृद्धि हुने विश्वास व्यक्त गरे। साथै, नेपाल र थाइल्यान्डबीच ६५ वर्षदेखि कायम रहेको कूटनीतिक सम्बन्ध र जनता–जनताबीचको सम्बन्धलाई अझ विस्तार गर्ने विषयमा छलफल भएको बताए।
उनले नेपालमा होटल व्यवसाय, हवाई सेवा तथा पर्यटन क्षेत्रमा थाइल्यान्डको लगानी प्राथमिकतामा पर्ने उल्लेख गरे।
“नेपाल र थाइल्यान्डबीच कृषि, व्यापार, पर्यटन, संस्कृतिको गहिरो सम्बन्ध छ। थाइल्यान्डका लगानीकर्तालाई नेपालमा लगानी गर्न म आह्वान गर्दछु,” प्रधानमन्त्री ओलीले भने, “अब हामी अन्तर्राष्ट्रिय मुद्दाहरूमा हातेमालो गर्दै जलवायु परिवर्तनका क्षेत्रमा पनि सहकार्य गर्नेछौं।”
