नेपाल सरकारले म्यानमारमा भूकम्प प्रभावितका लागि मेडिकल सहायतासहित २२ सदस्यीय टोली पठाएको छ। नेपाली सेनाको हेलिकप्टरमार्फत बुधबार उक्त टोली म्यानमारतर्फ प्रस्थान गरेको हो।
टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरू सहित औषधि र चिकित्सा उपकरणहरू समेटिएका छन्। नेपाली सेनाका अनुसार, टोलीले करिब एक साता म्यानमारमा रहँदै भूकम्प पीडितहरूको स्वास्थ्य उपचारमा खटिनेछ।
समाचार संस्था एएफपीका अनुसार, म्यानमारमा गएको विनाशकारी भूकम्पका कारण अहिलेसम्म २,०५६ जनाको मृत्यु भइसकेको छ भने ३,९०० भन्दा बढी घाइते भएका छन्।
चार दिन बितिसक्दा पनि उद्धार टोलीहरूलाई राहत सामग्री वितरण गर्न कठिनाइ भइरहेको छ। सञ्चार सेवा अवरुद्ध भएका कारण धेरै प्रभावित क्षेत्रहरूसँग अझै सम्पर्क स्थापित हुन सकेको छैन।
