सोलुखुम्बु ।
सगरमाथा आधार शिविरमा कार्यरत एक श्रमिकको ज्यान गएको छ। मृत्यु हुनेमा दोलखा, गौरीशङ्कर गाउँपालिका–९ का ५५ वर्षीय लानिमा शेर्पा रहेका छन्।
जिल्ला प्रहरी कार्यालय सोलुखुम्बुका अनुसार, शेर्पा खुम्बु पासाङल्हामु गाउँपालिका–४ स्थित सगरमाथा बेस क्याम्पमा कार्यरत थिए।
प्रहरी नायब उपरीक्षक द्वारिकाप्रसाद घिमिरेका अनुसार चैत १७ गते साँझ ७:३० बजे शेर्पालाई लेक लागेपछि बिरामी परेका थिए।
घोडामार्फत खुम्जुङ स्वास्थ्य चौकी लैजाने क्रममा चैत १८ गते थुक्लामा उनको निधन भएको जनाइएको छ।
शवको कानुनी प्रक्रिया पूरा गरी अल्टिच्युट हेलिकप्टरमार्फत शव परीक्षणका लागि टिचिङ अस्पताल, काठमाडौं पठाइएको थियो।
चैत १९ गते मृतकका भतिजा पेमाछिरी शेर्पाले शव बुझी लगेको जनाइएको छ। घटनाबारे थप अनुसन्धान भइरहेको प्रहरीले जनाएको छ।
