काठमाडौँ ।
ऊर्जा, जलस्रोत तथा सिँचाइमन्त्री दीपक खड्कासँग नेपालका लागि रसियाका राजदूत एलेक्सी नोभिकभले शिष्टाचार भेटवार्ता गरेका छन्। मन्त्रालयमा आज भएको भेटमा द्विपक्षीय आपसी हित र सहकार्यका विविध विषयमा छलफल भएको थियो।
भेटका क्रममा मन्त्री खड्काले रसियन सरकारले नेपालको जनशक्ति विकासमा पुर्याएको योगदानप्रति धन्यवाद दिए। उनले पनौती जलविद्युत् आयोजना रसियाको सहयोगमा निर्माण भएको स्मरण गर्दै, नेपाल सरकारले सन् २०३५ सम्म २८,५०० मेगावाट विद्युत् उत्पादन गर्ने लक्ष्य लिएको बताए। उक्त लक्ष्य हासिल गर्न रसियाको साथ आवश्यक रहेको उनले उल्लेख गरे।
मन्त्री खड्काले नेपालको प्रसारण लाइन, ऊर्जा भण्डारण, स्मार्ट ग्रीड, हरित ऊर्जालगायतका क्षेत्रमा लगानीको वातावरण मिलाउन रसियाली कम्पनीलाई आग्रह गरे।
त्यसैगरी, राजदूत नोभिकभले नेपालका ऊर्जा तथा जलविद्युत् क्षेत्रमा रसियन लगानीकर्ताहरूले चासो राखेको बताए।
भेटमा राजदूत नोभिकभले मन्त्री खड्कालाई रसियामा आयोजना हुने विभिन्न अन्तर्राष्ट्रिय कार्यक्रमहरूमा भाग लिन निम्तो दिएका छन्, जसमा:
मे महिनामा हुने नेभेस्की इन्टरनेसनल इकोलोजिकल कंग्रेस,
जुन महिनामा हुने सेन्ट पिटर्सवर्ग इन्टरनेसनल इकोनोमी फोरम,
अक्टोबर महिनामा आयोजना हुने रसियन इनर्जी वीक समावेश छन्।
