काठमाडौं ।
राष्ट्रपति रामचन्द्र पौडेलले नेपालको संविधानले नागरिकलाई आफ्नो विचार अभिव्यक्त गर्ने निर्वाध स्वतन्त्रता प्रदान गरे पनि हिंसा, आगजनी, लुटपाट र तोडफोड निषेधित रहेको बताएका छन्।
बुधबार रेडियो नेपालको हीरक महोत्सवलाई सम्बोधन गर्दै, उनले लोकतन्त्रमा जनताको अभिमत नै सबैभन्दा ठूलो शक्ति हुने बताए। साथै, संविधानको व्यवस्था, मर्म र भावनालाई कसैले भुल्न नहुने उनको भनाइ थियो।
राष्ट्रपति पौडेलले भने,‘नेपालको संविधानले नागरिकलाई आफ्नो असहमति राख्ने अधिकार प्रदान गरेको छ। संघीय लोकतान्त्रिक गणतन्त्रको यो सर्वाधिक सुन्दर पक्ष हो। तर, संविधानले प्रदान गरेको यो अधिकार प्रयोग गर्दा हामी राज्य, कानून र जनताप्रति जिम्मेवार पनि हुनुपर्छ।’
राष्ट्रपतिले संविधानको भावना विपरीत हुने हिंसात्मक गतिविधिहरू रोक्न सबै पक्ष गम्भीर बन्नुपर्ने बताए।
नेपालको लोकतान्त्रिक आन्दोलनमा पत्रकारिता र सञ्चारमाध्यमको महत्त्वपूर्ण भूमिका रहेको बताउँदै राष्ट्रपति पौडेलले संविधानमा प्रेस स्वतन्त्रताको पूर्ण सुनिश्चितता गरिएको स्मरण गराए।
राष्ट्रपति पौडेलले लोकतन्त्रमा जिम्मेवार नागरिक समाज र स्वतन्त्र प्रेसको भूमिका झनै महत्वपूर्ण हुने उल्लेख गरे।
