काठमाडौं, 

तीनकुनेमा भएको प्रदर्शनका प्रमुख योजनाकार दुर्गा प्रसाईंलाई थप अनुसन्धानका लागि हिरासत म्याद लम्ब्याउन काठमाडौं जिल्ला अदालतमा पेस गरिएको छ।

प्रहरी स्रोतका अनुसार उनलाई केहीबेरअघि जिल्ला सरकारी वकिलको कार्यालयमार्फत अदालत ल्याइएको हो। प्रहरीले प्रसाईंलाई कम्तीमा १२ दिनसम्म हिरासतमा राखेर अनुसन्धान गर्न अनुमति माग गरेको छ। उनीसँगै पक्राउ परेका उनका सुरक्षाकर्मी दीपक खड्काको पनि सोही अवधिको म्याद माग गरिएको छ।

यसअघि, प्रदर्शनकै सिलसिलामा पक्राउ परेका राप्रपाका नेताहरू रवीन्द्र मिश्र र धवलशमशेर जबरालाई १५ दिनका लागि थुनामा राख्ने अदालतको आदेश भइसकेको छ। उनीहरूसँग अनुसन्धानको म्याद मिलाउनका लागि प्रसाईंको हकमा पनि १२ दिनको म्याद आवश्यक भएको प्रहरीले जनाएको छ।

भारतबाट पक्राउ गरी नेपाल ल्याइएका प्रसाईंलाई हालै जिल्ला प्रहरी परिसर काठमाडौंमा राखिएको थियो। आवश्यक कानुनी प्रक्रिया पूरा गरेपछि उनलाई सरकारी वकिलको कार्यालय ल्याइएको हो र त्यसपछि अदालतमा प्रस्तुत गरिएको हो।

प्रसाईंविरुद्ध ज्यान मार्ने उद्योग लगायतका गम्भीर आपराधिक अभियोगमा मुद्दा चलाउने तयारी प्रहरीले गरिरहेको छ।

गत चैत १५ गतेको विरोध प्रदर्शनपछि उनी फरार भएका थिए। त्यसपछि खोजी कार्य तीव्र पार्दै प्रहरीले उनीलाई नियन्त्रणमा लिएको हो।