काठमाडौँ 

हङकङमा जारी चार राष्ट्रबीचको टी–२० अन्तर्राष्ट्रिय सिरिजको उपाधि भिडन्तमा आज नेपाल र कुवेत आमनेसामने हुँदैछन्। शनिबार वर्षाले अवरुद्ध पारेको खेलपछि नेपाल रन रेटको आधारमा फाइनलमा स्थान सुरक्षित गर्दै कुवेतसँगको पुनः भेटका लागि तयारी अवस्थामा पुगेको हो।

लिग चरणमा शानदार प्रदर्शन गरेको नेपालले सुरुवाती दुई खेलमा कतार र कुवेतलाई सहजै पराजित गर्दै ५ अंकका साथ शीर्ष स्थानमा रहँदै फाइनलको यात्रा तय गरेको हो। हिजोको खेलमा हङकङले ९ ओभरमा ३ विकेट गुमाउँदै ६८ रन बनाएको अवस्थामा वर्षाका कारण खेल रद्द भयो। यसै कारण नेपालले अतिरिक्त अंक बटुल्न सफल भयो।

समूह चरणमै नेपालले कुवेतमाथि ६ विकेटको सहज जित दर्ता गरेको थियो भने कतारलाई ८ विकेटले पराजित गर्दै लयमा रहेको संकेत दिएको थियो। उता, कतारलाई पछिल्लो खेलमा पराजित गर्दै कुवेतले पनि उपाधि भिडन्तमा स्थान बनाएको हो।

आजको खेल नेपालका लागि आफ्नो लय कायम राख्ने र सिरिजको उपाधि जित्ने अवसरका रूपमा रहेको छ। समूह चरणको आत्मविश्वास र प्रदर्शनलाई दोहोर्याउन सके नेपालले उपाधि उचाल्ने सम्भावना बलियो देखिन्छ।