रोजगार सबै नागरिकहरूका लागि आर्थिक उपार्जन गर्ने एक माध्यम हो । तालिमको अवसर र अपाङ्गता अनुकूलको वातावरण पाएको खण्डमा अन्य नागरिकहरू जस्तै डाउन सिण्ड्रोम अपाङ्गता भएका व्यक्तिहरूले पनि सीप सिकेर रोजगारमा सहभागी हुन सक्छन् । त्यसैले  बौद्धिक तथा डाउन सिण्ड्रोम अपाङ्गता भएका व्यक्तिहरूलाई पनि सीप प्रदान गरी रोजगारीमा संलग्न  गराउने उदेश्ले डाउन सिण्ड्रोम समाज नेपालले काठमाडौँमा डाउन सिण्ड्रोम अपाङ्गता भएका व्यक्तिहरूका लागि १५ दिने वेटर तालिम सञ्चालन गरेको छ ।

डाउन सिण्ड्रोम समाज नेपालले  सामाजिक विकास कार्यालय भैसेपाटी, ललितपुरको सहयोगमा बौद्धिक तथा डाउन सिण्ड्रोम अपाङ्गता भएका व्यक्तिहरू र उनीहरूका सहयोगीहरूका लागि बालुवाटार स्थित T21 क्याफेमा १५ दिने वेटर तालिम सञ्चालन गरिएको छ । वैशाख २८ गते उद्घाटन गरी सञ्चालन गरिएको उक्त १५ दिने वेटर तालिमका क्रममा डाउन सिण्ड्रोम समाज नेपालकी अध्यक्ष शिला थापाले डाउन सिण्ड्रोम अपाङ्गता भएका व्यक्तिहरूलाई रोजगारीका लागि पूर्ण तयारी गरेर यति जना व्यक्तिहरूले तालिम मार्फत सीप सिकेका छन् र उनीहरूलाई तालिम पश्चात् कुनै पनि निकायहरूले आंशिक रोजगार, पूर्ण रोजगारीका लागि वा घण्टाको हिसाबमा पनि रोजगारीमा सहभागी गराउन सकुन् भन्ने उद्देश्यले यो तालिम प्रदान गरिएको बताउनु भयो ।

यसै तालिमको उद्घाटनको प्रमुख अतिथि एवं महिला बालबालिका तथा ज्येष्ठ नागरिक मन्त्रालयकी उपसचिव निरा अधिकारीले डाउन सिण्ड्रोम समाज नेपालकी अध्यक्ष शिला थापाको अथक प्रयास र मेहनतले बौद्धिक तथा डाउन सिण्ड्रोम अपाङ्गता भएका व्यक्तिहरूले केही पनि गर्न सक्दैनन् भन्ने समाजलाई उनीहरूले सीप सिकेर आफ्नो परिश्रमबाट आए आर्जन गर्न सक्छन् भन्ने कुरा प्रमाणित गर्नु भएकोमा र राज्यले गर्न नसकेको काम गर्नु भएकोमा धन्यवाद दिँदै यस विषयमा राज्यको ध्यानाकर्षण गर्नको लागि हामी सबैले पहल गर्नु पर्ने बताउनु भयो ।

त्यसै गरी उहाँले सरकारले सञ्चालन गरेका प्रधानमन्त्री स्वरोजगार कार्यक्रम, युवा स्वरोजगार कार्यक्रमहरूमा पनि डाउन सिण्ड्रोम अपाङ्गता भएका व्यक्तिहरूलाई सहभागी गराउने कार्यमा पनि पहल गर्नु पर्ने भन्दै देशका ३ वटै तहका सरकारहरूले सञ्चालन गर्ने रोजगार देखिएका विभिन्न तालिमहरूका अपाङ्गता भएका व्यक्तिहरूलाई सहभागी गराउनु पर्ने बताउँदै यो १५ दिने वेटर तालिमको सफलताको शुभकामना व्यक्त गर्नु भयो । तालिम उद्घाटनका क्रममा नेपाल अपाङ्ग महिला संघकी महासचिव देबु कुमारी पराजुलीले यो तालिमले उनीहरूको रोजगारीको लागि सरोकारवाला निकायहरूसँग वकालत र पैरवी गर्नका लागि सहज हुने बताउनु भयो । साथै उहाँले यस तालिमले उनीहरूलाई आत्मनिर्भर र स्वावलम्बी बनाउन सहयोग गर्ने भएकोले सबै प्रशिक्षार्थीहरूलाई राम्रोसँग तालिममा सहभागी हुन आग्रह गर्दै तालिमको सफलताको शुभकामना व्यक्त गर्नु भयो ।

 उक्त १५ दिने वेटर तालिममा बौद्धिक तथा डाउन सिण्ड्रोम अपाङ्गता भएका महिला र पुरुष गरी १५ जना युवाहरूको सहभागिता रहेको छ ।  वैशाख २८ गते देखि सुरु भएको यो तालिम जेठ ११ गते  सम्म १५ दिन सञ्चालन हुने आयोजक संस्था डाउन सिण्ड्रोम समाज नेपालले जानकारी गराएको हो ।  बौद्धिक तथा डाउन सिण्ड्रोम अपाङ्गता भएका व्यक्तिहरुका लागि सञ्चालन गरेको तालिमको सहजीकरण डाउन सिण्ड्रोम समाज नेपालकी अध्यक्ष शिला थापाले सहजीकरण गर्नु हुने छ ।