परराष्ट्रमन्त्री डा. आरजु राणा देउवाले जापान भ्रमणको क्रममा जापान इन्टरनेसनल कोअपरेसन एजेन्सी (जाइका) का अध्यक्ष डा. तानाका अकिहिकोसँग टोकियोस्थित जाइकाको मुख्यालयमा भेटवार्ता गरेकी छन्। भेटमा नेपाल–जापानबीचको द्विपक्षीय सम्बन्ध र आपसी हितका विविध विषयमा छलफल भएको मन्त्री राणाको सचिवालयले जनाएको छ।

मन्त्री राणाले विगत लामो समयदेखि नेपाललाई विभिन्न क्षेत्रमा दिँदै आएको सहयोगप्रति जापान सरकार र जाइकाप्रति धन्यवाद व्यक्त गरिन्। उनले आर्थिक विकास, गरिबी न्यूनीकरण, विपद् जोखिम न्यूनीकरण, जलवायु परिवर्तन, सुशासन र प्रजातन्त्र सुदृढीकरणजस्ता क्षेत्रमा जाइकाले पुर्‍याउँदै आएको सहयोगको सराहना गरिन्।

विशेषगरी, नागढुङ्गा सुरुङमार्ग निर्माण, सिन्धुली–बर्दिबास सडकको पुनःनिर्माण तथा मर्मतसम्भारलगायत पूर्वाधार क्षेत्रमा जाइकाको सक्रियताका लागि उनले प्रशंसा जनाइन्।

भेटमा जलवायु परिवर्तन र यसको असर, विपद् व्यवस्थापन, सुशासन, ज्येष्ठ नागरिकसँग सम्बन्धित विषयहरूमा पनि दुवै पक्षबीच विस्तृत छलफल भएको सचिवालयले जनाएको छ।