जुम्ला।
जुम्लाको सिँजा गाउँपालिका–३ नराकोट बजारमा एकदिने पोषण प्रदर्शनी मेला सफलता पूर्वक सम्पन्न भएको छ। सिँजा गाउँपालिका स्वास्थ्य शाखाको आयोजनामा प्लान नेपाल र पेस नेपालको सहकार्यमा मेला सञ्चालन गरिएको हो।

मेलामा एक हजार दिनका आमा, पाँच वर्ष मुनिका बालबालिका, किशोर–किशोरी, महिला स्वास्थ्य स्वयंसेविका र ज्येष्ठ नागरिकको उल्लेखनीय सहभागिता रहेको थियो। मेलामा राखिएका विभिन्न स्टलहरूमा बिहानको खाजा, बिहानको भोजन, दिउँसोको खाजा र बेलुकाको खानाका पोषिलो परिकारहरू प्रदर्शन गरिएको थियो।

स्थानीय स्तरमै पाइने अर्गानिक खाद्य वस्तुहरूको प्रयोग, सही तरिकाले पकाउने विधि, सन्तुलित रूपमा सेवन गर्ने तरीका तथा उमेर समूहअनुसार बालबालिका र आमालाई आवश्यक पोषणबारे जानकारी दिनु मेलाको मुख्य उद्देश्य रहेको स्वास्थ्य शाखा प्रमुख ललित रोकायाले जानकारी दिनुभयो।

एकदिने पोषण प्रदर्शनी मेलाको औपचारिक उद्घाटन सिँजा गाउँपालिकाका अध्यक्ष पूर्णप्रसाद धितालले गर्नुभएको थियो।