कनकासुन्दरी गाउँपालिका–५, गोटिज्युलामा निर्माण सम्पन्न भएको प्रहरी चौकीको पक्की भवनको बुधबार औपचारिक रूपमा उद्घाटन गरिएको छ। प्रहरी नायव महानिरीक्षक (डीआईजी) माधवप्रसाद श्रेष्ठले उक्त भवनको विधिवत रूपमा उद्घाटन गर्नुभएको हो।

आर्थिक वर्ष २०८१/०८२ मा नेपाल सरकारको ४ करोड ५५ लाख ५ सय ४९ रुपैयाँ लागतमा निर्माण गरिएको तीन तले पक्की भवन मल्ल–न्यौपाने जेभीले निर्माण कार्य सम्पन्न गरेको हो।

उद्घाटन कार्यक्रममा बोल्दै डीआईजी श्रेष्ठले प्रहरी नागरिकको सेवक भएको उल्लेख गर्नुभयो। उहाँले देशमा शान्ति, सुरक्षा, अमनचयन र सुशासन कायम राख्न प्रहरी दिनरात खटिरहेको भए पनि यसअघि चुहिने टिनको छानामुनि बस्न बाध्य भएको बताउनुभयो। अब सुविधा सम्पन्न पक्की भवन बनेपछि प्रहरीलाई बसोबास र काम गर्न सहज हुने उहाँको भनाइ थियो।

“जसरी नयाँ भवनमा हाम्रो बसाइँ सुरु भएको छ, त्यसैगरी अब यस क्षेत्रमा प्रहरीले आधुनिक प्रविधि र नयाँ कार्यशैली अपनाएर सेवा प्रवाह गर्नुपर्छ,” उहाँले भन्नुभयो।

गाउँपालिका अध्यक्ष दामोदरप्रसाद आचार्यले पालिकाभित्र रहेका प्रहरी चौकीसँग सहकार्य गर्दै अघि बढिरहेको बताउनुभयो। शान्ति सुरक्षालाई थप मजबुत बनाउन पालिकाका तर्फबाट गर्न सक्ने सबै सहयोग निरन्तर रहने उहाँले प्रतिबद्धता व्यक्त गर्नुभयो।

उद्घाटन कार्यक्रममा स्थानीयवासी, जनप्रतिनिधि, राजनीतिक दलका अगुवा लगायतको उल्लेख्य उपस्थिति रहेको थियो। तीन तले उक्त भवनमा कार्यकक्ष, गार्ड रुम, सञ्चार कक्ष, पुरुष तथा महिला हिरासत, मनोरञ्जन कक्ष, भान्साघर र शौचालयको व्यवस्था गरिएको छ।

टिनको टहरामा बसेर दिनरात सेवा गर्दै आएका प्रहरी अब सुविधा सम्पन्न पक्की भवन पाउँदा निकै खुसी भएका छन्।