काठमाडौं

प्रधानमन्त्री सुशीला कार्की नेतृत्वको मन्त्रिपरिषद् आजै विस्तार हुने भएको छ। प्रधानमन्त्री कार्यालयका अनुसार चारजनाको नाम मन्त्रिपदका लागि सिफारिस भई राष्ट्रपति कार्यालय पुगेको छ, र उनीहरूको शपथ पनि आजै हुने प्रक्रिया मिलाइएको छ।

मन्त्रीका रूपमा सिफारिस गरिएका व्यक्तिहरूमा कुमार इन्गनाम, माधव चौलागाईँ, राजेन्द्र सिंह भण्डारी र श्रद्धा श्रेष्ठ रहेका छन्। स्रोतका अनुसार इन्गनामलाई भूमि मन्त्रालय, चौलागाईँलाई वन मन्त्रालय, भण्डारीलाई श्रम मन्त्रालय तथा श्रेष्ठलाई महिला तथा सामाजिक क्षेत्रसम्बन्धी मन्त्रालयको जिम्मेवारी दिन तयारी भएको छ।

मनोनयनमा परेका व्यक्तिहरू विभिन्न पृष्ठभूमिबाट आएका छन्। नेपाल प्रहरीका पूर्व एआईजी भण्डारी सुरक्षा क्षेत्रबाट, त्यसैगरी काठमाडौं स्कुल अफ लका प्रोफेसर इन्गनाम शैक्षिक क्षेत्रबाट प्रतिनिधित्व गर्नेछन्। श्रद्धा श्रेष्ठ पर्यटन बोर्डमा कार्यरत रहँदै आएका कर्मचारी हुन् भने चौलागाईँ जनस्वास्थ्य पृष्ठभूमिबाट आएका हुन्।

यी चार नयाँ सदस्य समावेश भएपछि मन्त्रिपरिषद्को संरचना १४ सदस्यमा पुग्नेछ।