काठमाडौँ ।

अन्तरिम सरकारकी प्रधानमन्त्री सुशीला कार्की ले निर्वाचनको संघारमा परेको होली पर्वले देशभर नयाँ ऊर्जा र सकारात्मक सन्देश फैलाउने विश्वास व्यक्त गरेकी छन्। सोमबार देशवासीका नाममा सम्बोधन गर्दै उनले रङ्गहरूको पर्वले नेपाली समाजमा एकता, सद्भाव र उत्साह थप मजबुत बनाउने बताइन्।

फागु पूर्णिमाको अवसरमा स्वदेश तथा विदेशमा रहेका सम्पूर्ण नेपालीहरूलाई शुभकामना दिँदै उनले नेपालको विविधताभित्रको एकतालाई अझ सुदृढ बनाउन होलीले महत्वपूर्ण भूमिका खेल्ने उल्लेख गरिन्।

सम्बोधनका क्रममा प्रधानमन्त्री कार्कीले आफ्नो कार्यकालको समीक्षा पनि गरिन्। इतिहासकै चुनौतीपूर्ण घडीमा नेतृत्व सम्हाल्नुलाई मातृभूमिप्रतिको जिम्मेवारीका रूपमा लिएको बताउँदै उनले न्याय, निष्ठा र पारदर्शितालाई प्राथमिकतामा राखेर काम गरेको दाबी गरिन्।

छिट्टै देशको बागडोर जननिर्वाचित प्रतिनिधिहरूको हातमा जाने उल्लेख गर्दै उनले अन्तरिम सरकार आफ्नो मुख्य दायित्व — निर्वाचन सम्पन्न गराउने — सफलतापूर्वक पूरा गरेर सत्ता हस्तान्तरण गर्न पूर्ण रूपमा तयार रहेको स्पष्ट पारिन्।

निर्वाचन र पर्वको सन्दर्भलाई जोड्दै उनले शान्त, सभ्य र उत्साहपूर्ण वातावरणमा लोकतान्त्रिक अभ्यासलाई सफल बनाउन सबैलाई सहयोगको आह्वान गरेकी छन्।