काठमाडौं ।

हालै निर्वाचित राष्ट्रिय सभा सदस्यहरूको आज शपथ ग्रहण कार्यक्रम हुँदैछ। संसद् सचिवालयका अनुसार दिउँसो २ बजे सिंहदरबारस्थित कानुन, न्याय तथा मानव अधिकार समितिको हलमा शपथ ग्रहण कार्यक्रम आयोजना गरिएको छ। राष्ट्रिय सभाका अध्यक्ष नारायणप्रसाद दाहालले नवनिर्वाचित सदस्यहरूलाई पद तथा गोपनीयताको शपथ गराउनेछन्।

गत माघ ११ गते सम्पन्न राष्ट्रिय सभा निर्वाचनबाट १८ जना सदस्य निर्वाचित भएका थिए। ५९ सदस्यीय राष्ट्रिय सभामा एक तिहाइ सदस्यको पद प्रत्येक दुई–दुई वर्षमा रिक्त हुने भएकाले सो पदका लागि नियमित रूपमा निर्वाचन हुने व्यवस्था छ।

संसद् सचिवालयले नवनिर्वाचित सदस्यहरूलाई शपथ कार्यक्रममा औपचारिक वा आफ्नो पहिचान झल्कने पोशाकमा उपस्थित हुन अनुरोध गरेको छ। साथै उनीहरूले निर्वाचन आयोगबाट प्राप्त राष्ट्रिय सभा सदस्यको प्रमाणपत्र र नागरिकताको प्रतिलिपि साथमा ल्याउनुपर्नेछ।

नेपाली भाषाबाहेक मातृभाषामा शपथ लिन चाहने सदस्यले शपथको पाठ आफ्नो मातृभाषामा अनुवाद गरी एक प्रति फागुन २४ गतेभित्र संसद् सचिवालयमा बुझाउनुपर्ने व्यवस्था गरिएको छ।

यसपटकको निर्वाचनमा नेपाली कांग्रेस, नेकपा एमाले र लोकतान्त्रिक समाजवादी पार्टी (लोसपा) बीच तालमेल भएको थियो भने नेपाली कम्युनिस्ट पार्टी एक्लै चुनावी मैदानमा उत्रिएको थियो। निर्वाचन परिणामअनुसार तालमेलबाट उम्मेदवार बनेकाहरू नै विजयी भएका छन्।

नवनिर्वाचितमध्ये महन्थ ठाकुर, रामकुमारी झाँक्री, सुनिलबहादुर थापा र ललितजंग शाही यसअघि प्रतिनिधिसभामा काम गरिसकेका अनुभवी नेताहरू हुन्। विभिन्न प्रदेशबाट निर्वाचित अन्य सदस्यहरू पनि लामो राजनीतिक तथा सामाजिक अनुभव बोकेका व्यक्तित्वका रूपमा राष्ट्रिय सभामा प्रवेश गरेका छन्।

यसैबीच कार्यकाल सकिएका १९ मध्ये १८ पदका लागि निर्वाचन भएको थियो भने एक सदस्य राष्ट्रपतिबाट मनोनित हुने व्यवस्था अनुसार सरकारको सिफारिसमा राष्ट्रपतिले मनोनयन गर्नेछन्। निर्वाचन आयोगले सबै प्रक्रिया आगामी चैत ५ गतेभित्र सम्पन्न गर्ने लक्ष्य राखेको छ।