नयाँ दिल्ली ।

भारतीय प्रधानमन्त्री नरेन्द्र मोदीले जुलाईको सुरुमा रुस भ्रमणमा जाने तयारी गरेका छन् । भ्रमणका क्रममा प्रधानमन्त्री मोदी र रुसी राष्ट्रपति भ्लादिमिर पुटिनबीच वार्ता हुने बताइएको हो ।  यद्यपि यस विषयमा भारत र रुसबाट अहिलेसम्म कुनै आधिकारिक घोषणा आएको छैन ।

रुसको सरकारी समाचार एजेन्सी आरआईएका अनुसार रुसी राष्ट्रपतिका सहायक युरी उसाकोभले पत्रकारहरूलाई मोदीको भ्रमणको तयारी भइरहेको र दुवै पक्षले चाँडै मिति घोषणा गर्ने बताए । उशाकोभले भने, ‘हामी प्रधानमन्त्री मोदीलाई स्वागत गर्ने तयारी गरिरहेका छौँ। दुवै पक्षको सहमतिपछि मात्रै मिति घोषणा हुने भएकाले अहिले नै मिति दिन सक्दैनौँ । तर हामी सक्रिय रुपमा तयारी गरिरहेका छौँ । म फेरि भन्छु कि यो भ्रमण हुनेछ।’