काठमाडौं ।
क्रिसमसको अवसरमा आज साँझ आयोजना हुने कन्सर्टमा सांगीतिक प्रस्तुति दिन चर्चित भारतीय गायक सोनु निगम अपराह्न काठमाडौं आइपुगेका छन्।
त्रिभुवन अन्तर्राष्ट्रिय विमानस्थलमा उनलाई आयोजक ‘नेपाल टच’ का पदाधिकारीहरूले भव्य स्वागत गरेका थिए। निगमको सांगीतिक समूहका सदस्यहरू भने तयारीका लागि बुधबार बिहानै नेपाल आइपुगेका थिए।
सोनु निगमले नेपाली गीतहरूसहित आफ्ना प्रशस्तै हिट गीतहरू प्रस्तुत गर्दै हायात रिजेन्सीको मैदानमा तीन घण्टासम्म दर्शकलाई मनोरञ्जन दिने कार्यक्रम रहेको छ। यस कन्सर्टमा उनले नेपाली गीत ‘उकाली ओराली गर्दै’ लगायतका गीतहरू पनि समेट्ने आयोजकले जानकारी दिएको छ।
आयोजकले कन्सर्टमा करिब १०,००० दर्शकको सहभागिता रहने अपेक्षा गरेका छन्। सोनु निगमको यस प्रकारको प्रस्तुति नेपाली दर्शकहरूको लागि एक स्मरणीय क्षण हुने विश्वास गरिएको छ।
