काठमाडौँ ।

अभिनेत्री तथा सामाजिक अभियन्ता आशिका तामाङलाई नेपाल प्रहरीले बुधबार दिउँसो स्वयम्भुबाट पक्राउ गरेको छ। उनलाई अभद्र व्यवहारसम्बन्धी मुद्दामा नियन्त्रणमा लिइएको बताइएको छ।

जिल्ला प्रहरी परिसर काठमाडौँका एसएसपी बसन्त रजौरेले तामाङलाई पक्राउ गर्ने प्रक्रिया पुष्टि गरेका छन्। एसएसपी रजौरेका अनुसार, गत पुस २५ गतेको प्रहरी प्रतिवेदन र पुस २६ गतेको पशुपति क्षेत्र विकास कोषको जाहेरी पत्रका आधारमा, प्रहरी वृत्त गौशालाले तामाङविरुद्ध पुस २८ गते अभद्र व्यवहार कसूर शीर्षकमा जिल्ला प्रशासन कार्यालय काठमाडौँबाट पक्राउ अनुमति लिएको थियो।

सोही पक्राउ अनुमति अनुरूप बुधबार, जिल्ला प्रहरी परिसर काठमाडौँ र प्रहरी वृत्त स्वयम्भुबाट खटिएको प्रहरी टोलीले स्वयम्भु क्षेत्रबाट आशिका तामाङलाई पक्राउ गरेर प्रहरी वृत्त गौशालामा उपस्थित गराएको छ। अहिले प्रहरी वृत्त गौशालामा उनलाई थप अनुसन्धानको लागि राखिएको छ। प्रहरीले यस घटनाबारे थप जानकारी प्रदान गर्दै अनुसन्धान अघि बढाइरहेको छ।

प्रहरीका अनुसार, तामाङको यस कार्यले सार्वजनिक असहमति र विवाद उत्पन्न गराएको थियो, जसको कारण उनलाई नियन्त्रणमा लिइएको हो।