काठमाडौं।
नेकपा (माओवादी केन्द्र) की युवानेतृ लक्ष्मीकन्या बुढा (प्रतिक्षा)द्वारा लिखित पुस्तक ‘संकल्प यात्रा’ को भव्य विमोचन सम्पन्न भएको छ।
समाजवादी मोर्चा नेपाल द्वारा आयोजित “राष्ट्रिय राजनीति र समाजवादी मोर्चाको कार्यभार विचार गोष्ठी” कार्यक्रममा उक्त पुस्तक विमोचन गरिएको हो। विमोचन समारोहमा प्रमुख अतिथिका रूपमा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी)का अध्यक्ष माधव नेपाल, नेकपाका महासचिव नेत्रविक्रम चन्द ‘विप्लव’, र नेपाल समाजवादी पार्टीका अध्यक्ष महेन्द्र राय यादवको उपस्थितिमा पुस्तक विमोचन गरियो।
पुस्तक विमोचनका क्रममा प्रचण्डले लक्ष्मीकन्या बुढाको संघर्षमय जीवनको प्रशंसा गर्दै भन्नुभयो, “कर्णालीको विकट भूगोलमा जन्मेर व्यवस्थाको परिवर्तनका लागि बुढाले आफूलाई समर्पित गर्नुभएको छ। यो पुस्तकले नेपाली समाजको विकास, रुपान्तरण र आन्दोलनमा महिलाको ऐतिहासिक योगदानलाई दस्ताबेजीकरण गर्नेछ।”
नेकपाका प्रवक्ता खड्गबहादुर विश्वकर्मा ‘प्रकाण्ड’ले पनि बुढाको लेखनलाई प्रशंसा गर्दै भन्नुभयो, “सानै उमेरमा जनयुद्धमा होमिएकी कर्णालीकी छोरीले संघर्षको मर्मलाई पुस्तकमार्फत उजागर गर्नु एक साहसिक कार्य हो। ‘संकल्प यात्रा’ नेपाली महिलाको नेतृत्व क्षमताको प्रमाण हो।”
लेखिका लक्ष्मीकन्या बुढाले न्याय, समानता, र सभ्य समाज निर्माणको लागि समर्पित जीवनयात्रालाई यो पुस्तकमा उतार्नुभएको छ। उहाँका अनुसार, ‘संकल्प यात्रा’ जीवन संघर्ष, समर्पण, र समाज रुपान्तरणको अभियानलाई निरन्तरता दिने दृढताको कथा हो।
१७६ पृष्ठमा समेटिएको‘संकल्प यात्रा’लक्ष्मीकन्या बुढाको पाँचौं कृति हो। यसअघि उहाँले चारवटा पुस्तक प्रकाशित गरिसक्नुभएको छ। पुस्तकले नेपाली समाजको वर्गीय, जातीय, र लैंगिक न्यायको आन्दोलनलाई अझ सशक्त बनाउन महत्वपूर्ण भूमिका खेल्ने अपेक्षा गरिएको छ।
‘संकल्प यात्रा’ विमोचन समारोहले नेपाली साहित्य र राजनीतिक आन्दोलनलाई एकैसाथ सम्बोधन गर्दै लक्ष्मीकन्या बुढाको संघर्ष र योगदानलाई उच्च सम्मान दिएको छ। यो पुस्तक नेपाली समाज रुपान्तरणको दिशामा एउटा प्रेरणादायी दस्तावेज हुने विश्वास गरिएको छ।
