शिक्षा, विज्ञान तथा प्रविधिमन्त्री देवेन्द्र पौडेलले काठमाडौं मेडिकल कलेज (केएमसी) को आकस्मिक अनुमन गर्नुभएको छ ।

केएमसीले एमबीबीएस अध्ययनरत विद्यार्थीबाट अतिरिक्त शुल्क दिलएको विषय बाहिरिएपछि मन्त्री पौडेलले भक्तपुरस्थिति मेडिकल कलेजको अनुगमन गर्नुभएको हो ।

शिक्षामन्त्री पौडेलसँगै प्रमुख जिल्ला अधिकारी रुद्रादेवी शर्मा पनि पुग्नुभएको थियो । शिक्षामन्त्री पौडेलले शुल्क विवादबारे जानकारी लिनुभएको थियो ।उहाँले कलेजलाई सरकारले तोकेभन्दा बढी शुल्क नलिएको प्रमाणित गर्न पनि निर्देशन दिनुभएको छ ।
मन्त्री पौडेलले बढी शुल्क नलिएको प्रमाणित गर्न नसके कारबाही गर्ने प्रष्ट पार्नुभएको छ । केएमसीले अतिरिक्त शुल्क लिएको विरोधमा विद्यार्थीले बुधबारदेखि प्रदर्शन गरिरहेका छन्।

केएमसी र नोबेल मेडिकल कलेजले छात्रवृत्तिमा भर्ना भएका विद्यार्थीसँग पनि होस्टेल शुल्कका नाममा अतिरिक्त शुल्क उठाइरहेको खुलेको थियो। कलेजले नियमित विद्यार्थीबाट होस्टेलबाहेक पनि अतिरिक्त दुई लाख ३२ हजार पाँच सय ७९ रुपैयाँ उठाइरहेका छन्। रजिस्ट्रेसन, परीक्षा शुल्क, एफिलेसनबापत यो रकम लिन लागिएको हो। तर, चिकित्सा शिक्षा आयोगले यो रकम कुल शुल्क ४० लाख २३ हजारभित्रै पर्ने बताएको छ।

एमबिबिएस अध्ययन सक्दा पाँच वर्षमा प्रत्येक विद्यार्थीबाट होस्टेल र अतिरिक्त शुल्कसमेत गर्दा २० लाख बढी उठाउन खोजिएको छ। चिकित्सा शिक्षा आयोगले कलेजकै होस्टेलमा बस्नुपर्ने अनिवार्य नभएको स्पष्ट पारेको छ । तर, केएमसीले होस्टेल अनिवार्य गरी मासिक २५ हजार शुल्क मागेको विद्यार्थीले गुनासो गरेका छन् ।