बलिउड अभिनेता सिद्धार्थ मल्होत्रा र कियारा आडवाणी छिट्टै विवाह गर्दैछन्।
भारतीय सञ्चार माध्यम बलिउड हंगामाका अनुसार उनीहरू आगामी डिसेम्बरमा विवाह गर्दैछन्।
सिद्धार्थ र कियाराले ‘शेरशाह’ मा एकसाथ काम गरेका थिए। त्यसपछि उनीहरू प्रेम सम्बन्धमा रहेको बताइएको छ तर यसबारे उनीहरूले खुलेर बताएका छैनन्।
केही दिनअघि सिद्धार्थ रकुलप्रीत सिंहसँग आफ्नो फिल्म ‘थ्यांक गड’ को प्रमोशन गर्न भारतीय रियालिटी शो ‘बिग बोस’ मा पुगेका थिए। उक्त शोका होस्ट सलमान खानले सिद्धार्थलाई विवाहको शुभकामना दिँदै राम्रो निर्णय लिएको बताएका थिए।
त्यसो त केही महिनाअघि सिद्धार्थ र कियाराको ब्रेकअपको खबर बाहिरिएको थियो। अब उनीहरूले विवाह गर्ने निर्णय लिएका छन्।
‘शेरशाह जोडी सिद्धार्थ र कियारा डिसेम्बरमा विवाह गर्दैछन्। उनीहरूले विवाहको मिति पक्का गरिसकेका छन्। विवाहमा कति सदस्य उपस्थित हुने टुंगो नलागे पनि विवाहको तयारी सुरू भइसक्यो,’ बलिउड हंगामामा लेखिएको छ।
उक्त स्रोतका अनुसार सिद्धार्थ र कियाराले सेलिब्रेटीको लागि मुम्बईमा भव्य रिसेप्शन पार्टी राखेका छन्।
सिद्धार्थ अभिनीत फिल्म ‘थ्यांक गड’ प्रदर्शन भइरहेको छ। यसबाहेक उनी ‘यौद्धा’ र ‘मिशन मजनू’ मा देखिनेछन्।
त्यस्तै कियारा ‘गोविन्दा नाम मेरा’ र ‘सत्यप्रेमकी कथा’ देखिनेछिन्।
