बलिउड अभिनेत्री जाह्नवी कपूर अगामी फिल्म ‘मिली’ को प्रमोशनमा व्यस्त छिन्।

फिल्मको प्रमोशनको क्रममा उनले जुनियर एनटिआरसँग दक्षिण भारतीय फिल्ममा काम गर्न तयार भएकाे बताएकी छिन्।

‘मैले पहिला धेरै पटक भनेको छु कि मलाई एनटिआरको अभिनय मन पर्छ। उहाँ उत्कृष्ट अभिनेता हुनुहुन्छ। म उहाँसँग काम गर्ने अवसरको प्रतीक्षामा छु,’ उनले एक भारतीय सञ्चार माध्यमसँग कुरा गर्दै भनिन्।

बलिउडका धेरै अभिनेत्रीले दक्षिण भारतीय फिल्ममा अभिनय गरेका छन्। बलिउड अभिनेत्री आलिया भट्ले जुनियर एनटिआर र रामचरणसँग ‘आरआरआर’मा अभिनय गरेकी थिइन्। फिल्ममा आलियाको छोटाे भूमिका थियो।

जाह्नवी अभिनेत्री श्रीदेवीकी छोरी हुन्। उनी पछिल्लो समयकी राम्रो अभिनय गर्न सक्ने क्षमता भएकी अभिनेत्री भित्र पर्छिन्। तर बारम्बार उनको तुलना श्रीदेवीसँग हुन्छ।

जाह्नवीका बुबा निर्माता बोनी कपूरले पनि उनलाई श्रीदेवीसँग तुलना गर्न उचित नभएको बताउँदै आएका छन्। किनकी श्रीदेवीले आफ्नो अभिनयको यात्रा सानै उमेरदेखि सुरु गरेकी थिइन्।

श्रीदेवीकी कान्छी छोरी खुशी पनि बलिउडमा डेब्यू गर्दैछिन्। उनले जोया अख्तरको फिल्म ‘द आर्चिज’ बाट डेब्यु गर्न लागेकी हुन्। यसै फिल्मबाट शाहरूख खानकी छोरी सुहाना खान र अमिताभ बच्चनका नाति अगस्त्य नन्द पनि डेब्यु गर्दैछन्।