लोकतान्त्रिक बाम गठबन्धनको तर्फबाट संखुवासभामा प्रतिनिधीसभा सदस्यका उम्मेदवार रहेका काँग्रेस नेता दिपक खड्काले संखुवासभाको एकमात्र विमानस्थल तुम्लिङटार विमानस्थललाई विस्तार र आधुनिकीकरण गर्ने बताउनुभएको छ ।
आगामी मंसिर ४ गते हुन लागेको प्रतिनिधीसभा तथा प्रदेशसभा निर्वाचनमा संखुवासभाबाट प्रतिनिधीसभा उम्मेदवार बन्नुभएका नेता खड्काले संखुवासभाको पर्यटन र उद्योग क्षेत्रको विकासका लागि विशेष जोड दिने बताउनुभएको हो ।
गठबन्धनका उम्मेदवार खड्काले सबैखाले पर्यटन हिमाली, पर्वतीय, धार्मिक, सांस्कृतिक, पर्यावरण, जलयात्रा, पदयात्रा, अध्ययन अनुसन्धान आदी पर्यटनको विकास गरि आन्तरिक र बाह्य पर्यटकलाई आकर्षित गर्ने नीति लिने बताउनुभएको छ ।
उहाँले जिल्लाभित्रका हिमाल आरोहीलाई सम्मान गर्ने, पदमार्ग, होमस्टे र होटलको प्रवद्र्धन गर्ने, पर्यटनसम्बन्धी जानकारी लिन र प्रवद्र्धन गर्न मोबाइल एप्लिकेशन तयार गरिने, किमाथांका नाका सञ्चालनमा ल्याई आयत निर्यातका लागि सुख्खा बन्दरगाह निर्माण गरिने बताउनुभएको छ ।
यसैगरी, स्थानीय उत्पादन प्रवद्र्धनका लागि ‘उपहार घर’ सञ्चालनमा ल्याइने, विगतमा विविध कारणले बन्द हुन पुगेका र हालसम्म नजर पुग्न नसकेका तर प्रशस्त स्वदेशी, विदेशी पर्यटक भित्र्याउन सकिने सम्भाव्यता रहेका पदमार्गहरु सञ्चालनमा ल्याइने बताइएको छ ।
