अभिनेता पुष्प खड्का र अभिनेत्री साम्राज्ञी राज्यलक्ष्मी शाहको मुख्य भूमिका रहेको फिल्म ‘तिम्रो मेरो साथ’ को टिजर सार्वजनिक भएको छ।
शुक्रबार बोधी एजडीको युट्युब च्यानलमार्फत फिल्मको टिजर सार्वजनिक गरिएको हो।
सार्वजनिक टिजरमा माया, प्रेम र बदलाको कथा देख्न सकिन्छ। १ मिनेट ३० सेकेण्ड लामो टिजरले दर्शकमाझ कौतूहलता पैदा गर्ने देखिन्छ।
रमेश एमके पौडेल निर्देशित फिल्ममा पुष्प र साम्राज्ञीसँगै सन्दिप क्षेत्री, इमिली लामा, सरोज खनाल, दिपिशा केसी, खड्क बहादुर पुन (खबपु)लगायत कलाकारको अभिनय छ। यो पौडेलको डेब्यु निर्देशकिय फिल्म हो।
‘तिम्रो मेरो साथ’ मा पौडेल स्वंयमको कथा, गीत र लगानी रहेको छ। फिल्मलाई सबिर श्रेष्ठ तथा बाबुराम निरौलाले मिलेर लेखेका हुन्।
आर्यन फिल्मस् र बोधी एचडीको ब्यानरमा निर्माण भएको फिल्ममा पासाङ लामा निर्माता हुन् भने निरू भण्डारी, अशोक पोखरेल, सुमन पौडेल तथा सुधिर पराजुली सह-निर्माताका रूपमा रहेका छन्। फिल्मको कार्यकारी निर्माता सविर श्रेष्ठ हुन्।
यो फिल्म आगामी पुस २९ गतेदेखि प्रदर्शन हुनेछ।
