काठमाडौं ।
ट्युनिसियाले आगामी ६ महिनाका लागि पिउने पानीमा कोटा सिस्टम लागू गरेको छ । अर्थात् पिउनका लागि समेत नापी नापीकन पानी पाइनेछ ।
साथै खेतबारीमा पानीको प्रयोग गर्न पूर्णरुपमा प्रतिबन्ध लगाइएको छ ।
यो नियम त्यहाँ आगामी सेप्टेम्बर ३० सम्म लागू हुनेछ ।
सुख्खा खडेरीका कारण ट्युनिसियामा बाँधमा पानीको क्षमता १ सय करोड क्युबिक मिटरबाट घटेर केवल ३० प्रतिशत मात्रै बाँकी रहेको छ । गत वर्षको सेप्टेम्बर महिनादेखि ट्युनिसिया कडा खडेरीसँग जुधिरहेको छ ।
नयाँ नियम अनुसार अब पानीले गाडी धुन पाइनेछैन भने रुख विरुवामा पनि पानी हाल्न पाइने छैन । साथै बाटो तथा गल्ली र सार्वजनिक स्थानहरु समेत पानीले सफा गर्न पाइनेछैन ।
कसैले नियम उल्लंघन गरेमा जरिवाना तथा जेल सजाय समेत हुनेछ ।
ट्युुनिसियाको जल कानून अनुसार उल्लेखित नियम उल्लंघन गरेमा ६ दिनदेखि ६ महिनासम्मको जेल सजाय हुनसक्नेछ ।
त्यहाँ सरकारले रातको समयमा पानीको वितरणमा कटौती सुरु गरिसकेको छ । सरकारले पानीको वितरणमा कन्जुस्याइँ गरेसँगै आम मानिसमा आक्रोस बढेको छ ।
सरकारको निर्णयसँगै देशमा सामाजिक रुपमा समेत तनावको अवस्था सिर्जना भएको बताइएको छ । साथै यसले महंगी समेत तिव्र रुपमा बढेको छ ।
ट्युनिसियाको उत्तरी क्षेत्रमा रहेको सबैभन्दा धेरै पानीको आपूर्ति गर्ने सिदी सलेम बाँधको पानी केवल १६ प्रतिशत मात्रै बँचेको छ ।
ट्युनिसियाको किसान संघका अधिकारी मोहम्मद रजाइबियाका अनुसार पानीको अभावका कारण ट्युनिसियामा कृषि उत्पादनमा पनि उल्लेख्य गिरावट आएको छ ।
अघिल्लो वर्ष साढे ७ लाख खाद्यान्न उत्पादन भएकोमा यो वर्ष घटेर २ देखि अढाई लाख टनमा झरेको छ ।
– एजेन्सीको सहयोगमा
