काठमाडौं ।
नेपाल भलिबल संघले काभा नेशन्स लिग खेल्ने पुरुष राष्ट्रिय भलिबल टिमको बिदाइ गरेको छ ।
किर्गिस्तानको बिस्केकमा आउने असार ३ देखि १० सम्म हुने प्रतियोगिताका लागि नेपाल टिम शुक्रबार त्यसतर्फ प्रस्थान गर्नेछ ।
बिहीबार राष्ट्रिय खेलकुद परिषद (राखेप)का सदस्यसचिव टंकलाल घिसिङ, नेपाल भलिबल संघका अध्यक्ष जितेन्द्रबहादुर चन्दलगायतले नेपाल टिमको बिदाइ गरेका हुन् ।
सेन्ट्रल एसियन भलिबल संघ (काभा)अन्तर्गत माथिल्लो वरीयताका टिमहरुसँग नेपालले नेशन्स लिगमा प्रतिस्पर्धा गर्दैछ ।
यो प्रतियोगितालाई नेपालले साउनमा श्रीलंकामा हुने सेन्ट्रल एसियन सिनियर मेन्स भलिबल प्रतियोगिता र असोजमा हुने एसियाली खेलकुदको तयारीका रुपमा लिएको छ ।
प्रतियोगितामा आयोजक किर्गिस्तानसँगै नेपाल, इरान, मंगोलिया, काजकस्तान, तुर्कमेनिस्तान र उज्वेकिस्तान छन् ।
प्रतियोगिता राउण्ड रोविन प्रणालीमा हुनेछ । कप्तान परिवर्तन नेपाल टिममा कप्तान परिवर्तन गरिएको छ ।
इम रानामगर टिममा नहुँदा ३० वर्षीय हरिहजुर थापालाई कप्तानको जिम्मेबारी दिइएको छ । इम र हरिहजुर दुवै सेटर पोजिसनका खेलाडी हुन् ।
त्रिभुवन आर्मी क्लबका हरिहजुरले नयाँ जिम्मेबारीका साथ आफू उत्साहित रहेको बताए ।
त्यस्तै टिमका नियमित लिबेरो इश्वर थापामगर पनि यसपल्ट छैनन् । उनको स्थानमा नेपाल पुलिस क्लबका भीमबहादुर गाहा मगरले नेपाल टिमको प्रतिनिधित्व गर्नेछन् ।
प्रशिक्षक जगदीश भट्ट र सहायक प्रशिक्षक भरत यादवको प्रशिक्षणमा नेपाल टिमले एक महिना तयारी गरेको हो ।
आर्थिक अभाव भन्दै नेपाल भलिबल संघले यो प्रतियोगिताका लागि टिमको बन्द प्रशिक्षण भने राखेको थिएन ।
नेपाल टिम
हरिहजुर थापा, लोकेन्द्रराज गिरी, मानबहादुर श्रेष्ठ, टेकराज अवस्थी, राजेन्द्र विष्ट, रोविन चन्द, दुर्गाबहादुर खड्का, हरिबहादुर अधिकारी, सफल विक, धनबहादुर भट्ट क्षेत्री, हेमन्तबहादुर मल्ल र भीमबहादुर गाहा ।
