चितवन ।

चितवनको खैरहनी नगरपालिकाको बजेटको आकार घटेको छ । नगरपालिकाका उपप्रमुख कविता उप्रेतीले पेश गरेको आगामी आर्थिक वर्षको बजेट चालु आर्थिक वर्षको भन्दा ४१ करोड ३४ लाख ८० हजार कम छ ।

नगरपालिकाले आगामी आर्थिक बर्षका लागि ९४ करोड ८८ लाख ९५ हजारको बजेट पेश गरेको छ ।

चालु आर्थिक बर्षका लागि गत वर्ष संशोधित १ अर्ब ३६ करोड २३ लाख ७७ हजारको बजेट पेश गरिएको थियो । आगामी आर्थिक वर्षका लागि नगरपालिकाले चालु खर्चतर्फ ४८ करोड २६ लाख ८४ हजार -५०.८६ प्रतिशत) र पुँजीगततर्फ ४६ करोड ६२ लाख ११ हजार -४९.१४प्रतिशत) बजेट विनियोजन गरेको छ ।

नगरपालिकाले आगामी आर्थिक वर्ष आन्तरिक आय १७ करोड ७० लाख ३८ हजार, संघीय सरकारको सशर्त अनुदान २४ करोड १४ लाख, समानीकरण अनुदान १५ करोड ७६ लाख र संघीय सरकारबाट बाँडफाँट भई प्राप्त हुने ११ करोड ३४ लाख २० हजार, भारतीय राजदूतावासबाट प्राप्त हुने आय १ करोड र चालु आर्थिक वर्षको अनुमानित बैंक मौजदात ४ करोड गरी नगरपालिकाले ९४ करोड ८८ लाख ९५ हजार आय अनुमान गरेको छ ।

यस्तै व्ययतर्फ कार्यसञ्चालन तथा प्रशासनिक खर्च ११ करोड ९९ लाख, नगरस्तरीय गौरवका आयोजनामा ७ करोड ७० लाख, नगरस्तरीय योजना तथा कार्यक्रम खर्च तर्फ ४९ लाख २५ हजार, नगरस्तरीय पूर्वाधारका कार्यक्रमहरु ३ करोड ४० लाख ४० हजार खर्च हुने अनुमान छ ।

वडास्तरीय योजना तर्फ १७ करोड २६ लाख, विषयगत शाखा तर्फ १४ करोड ५ लाख, नगरस्तरीय विभिन्न कोष तर्फ १ करोड ५० लाख, म्याचिङ्ग फण्डमा २ करोड र अन्तर सरकारी वित्तीय हस्तान्तरण तर्फ ३६ करोड ४९ लाख ३० हजार गरी जम्मा ९४ करोड ८८ लाख ९५ हजार व्यय अनुमान गरिएको छ ।