जापानी प्रधानमन्त्री फुमियो किशिदाले बिहीवार  आगामी ‘शुन्टो’ तलब वार्तामा कर्मचारीका तलब बढाउन कम्पनी तथा व्यवसायहरुलाई अनुरोध गरेका छन् । सम्पत्ति वितरणसम्बन्धी आफ्नो नीतिगत लक्ष्य हासिल गर्न खोजिरहेका किशिदाले जापान विजनेश फेडरेशन (केइदानरेन )को बैठकमा  बिहिबार यस्तो अनुरोध गरेका हुन् ।

‘तलब बढाएर सम्पत्ति वितरण गर्नु भनेको भविष्यमा लगानी गर्नु हो,’ बैठकमा किशिदाले भनेका छन् । किशिदाले तलब वृद्धिलाई सम्पत्ति वितरणको अचुक रामवाणका रुपमा हेरेका छन् । उनले वार्षिक आम्दानी कोरोना भाइरसको महामारी पूर्वको स्तरमा उक्लिएका कम्पनीहरुलाई कर्मचारीका तलब ३ प्रतिशतले बढाउन आग्रह गरिरहेका छन् ।

तर केइदान्रेनले भने समग्रमा तलब बढाउन वा सदस्य कम्पनीहरुलाई तलब वृद्धिको लक्ष्य तोकिदिने योजना बनाएको छैन । गैर–म्यानुफ्याक्चरिङ कम्पनीका तुलनामा म्यानुफयाक्चरिङ कम्पनीहरु कोरोना भाइरसको महामारीको प्रभावबाट छिटै उम्किएका छन् । यस्तोमा हरेक कम्पनीको अवस्थाअनुसार विचार गर्नु जरुरी भएको केइदान्रेनका प्रमुख मासाकाजु तोकुराले सो बैठकमा भनेका थिए ।