काठमाडौं।
राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले सत्तापक्ष आफैंले नागरिकताको विषयमा राजनीतिकरण गरिरहेको आरोप लगाएका छन् ।
सोमवार प्रतिनिधिसभा बैठकमा बोल्दै उनले नागरिकताको समस्या समाधान गर्ने भए तत्काल नागरिकता विधेयक संसदमा ल्याउन पनि सरकारलाई दबाब दिए ।
त्यसको कन्टेन्टमा छलफल गरेर फाष्ट ट्रयाकबाट विधेयक पारित गर्न आफूहरूको कुनै आपत्ति नरहेको अध्यक्ष लिङदेनको भनाइ थियो ।
सत्तापक्षले नेपालीलाई नागरिकता नदिने काम प्रतिपक्ष दलहरूबाट भएझैं गरेर गलत प्रचार गरिरहेको भन्दै उनले आपत्ति जनाए ।
‘नागरिकता विधेयकको प्रक्रियामा प्रतिपक्षहरूले विरोध गर्यो भनेर एउटा भाष्य निर्माण भइराखेको छ ।
हामीले कुनै पनि नेपाली जसका बाबुआमा नेपाली नागरिक छन् । उनीहरूले नागरिकता पाउनु हुँदैन भनेर भनेका छैनौं,’ उनले भने, ‘हामीले प्रक्रियाका कुरा गरेका छौं । छलफल गरेर लैजाऊ भनेका छौं ।’
