हेटौंडा ।
बागमती प्रदेशका मुख्यमन्त्री शालिकराम जम्कट्टेलले सरकार विस्तार गरेका छन् । बिहीबार संस्कृति, पर्यटन तथा सहकारी मन्त्रीमा हाम्रो नेपाली पार्टीका शैलेन्द्रमान बज्राचार्य नियुक्त भएका हुन् ।
बज्राचार्यले हेटौंडास्थित प्रदेश प्रमुखको कार्यालयमा प्रदेश प्रमुख यादवचन्द्र शर्माबाट नेपाल भाषामा पद तथा गोपनीयताको शपथ लिएका छन् ।
बज्राचार्यलाई २९ फागुनमै मन्त्री नियुक्त गर्ने तयारी गरिएको थियो । तर उनी काठमाडौैंबाट हेटौंडा नआएपछि मुख्यमन्त्री जम्कट्टेलको प्रयास विफल भएको थियो ।
बागमतीमा सत्ता गठबन्धनलाई सरकार बनाउन हाम्रो नेपाली पार्टीको समर्थन निर्णायक बनेको छ । सरकार बनाउन ५६ मत चाहिनेमा गठबन्धनका दल एमालेको २७, माओवादीको २१ र नेकपा एकीकृत समाजवादीको ७ सहित ५५ सिट मात्रै थियो । यसमा हाम्रो नेपाली पार्टीको २ मत थपिएको छ ।
प्रदेशसभामा सतारूढ दल नेपाली कांग्रेसको ३७, राप्रपाको १३ र नेमकिपाको ३ सिट छ ।
सत्ता समीकरणमा फेरबदल आएसँगै कांग्रेसले मुख्यमन्त्री शालिकराम जम्कट्टेल नेतृत्वको सरकारलाई दिएको समर्थन २३ फागुनमा फिर्ता लिएको थियो । बज्राचार्यले जिम्मेवारी पाएको पर्यटन मन्त्रालयमा यसअघि कांग्रेसका पुरार महर्जन मन्त्री थिए ।
