ताप्लेजुङको फक्ताङलुङ गाउँपालिका–७ ओलाङचुगोला गाउँका लागि गलैँचा उत्पादन मुख्य आम्दानीको स्रोत बनेको छ। यहाँको परम्परागत गलैँचा उत्पादन चीनको बजारमा राम्रो मागका साथ निर्यात हुँदै आएको छ। तर, कोभिड–१९ महामारीका कारण नाका बन्द हुँदा गलैँचा चीनसम्म पुग्न सकेको थिएन।

नाका खुलेसँगै, ओलाङचुगोलामा उत्पादित गलैँचा पुनः चीनका विभिन्न बजारमा निर्यात हुन थालेको छ। स्थानीय उद्यमी फुप् ल्हमु श्रेष्ठका अनुसार निर्यातले ग्रामीण समुदायलाई थप आर्थिक अवसर प्रदान गरेको छ। नेपाली बजारमा यी गलैँचाको मूल्य प्रतिएकाइ रु १० हजारदेखि २५ हजारसम्म पर्छ।

चीनको बजारमा भने सोही गलैँचाको मूल्य झण्डै दोब्बर देखिन्छ, जहाँ प्रति इकाइ रु १५ हजारदेखि ४५ हजारसम्ममा बिक्री हुने गरेको छ। मूल्यमा देखिएको अन्तरले स्थानीय उत्पादनकर्तालाई राम्रो मुनाफा दिलाएको छ।

नाका खुलेपछि निर्यात व्यापारले ओलाङचुगोला क्षेत्रका उद्यमी र हस्तकलाकारलाई आर्थिक समृद्धि दिलाउनुका साथै रोजगारीका अवसरहरू सिर्जना गरेको छ। स्थानीय उत्पादनलाई अन्तर्राष्ट्रिय बजारमा पु¥याउने अभियानले ओलाङचुगोला गाउँको समृद्धिमा महत्वपूर्ण योगदान पुर्‍याएको छ।