उत्तर म्यासेडोनियाको कोकानी शहरको ‘पल्स क्लब’ मा आइतबार बिहान आगलागी भएको छ। गृह मन्त्रालयका अनुसार, घटनामा कम्तीमा ५१ जनाको मृत्यु भएको र १०० भन्दा बढी व्यक्ति घाइते भएका छन्।

बीबीसीका अनुसार, आगलागी म्यासेडोनियाको राजधानी स्कोप्जेबाट करिब १०० किलोमिटर टाढा रहेको क्लबमा भएको थियो। सामाजिक सञ्जालमा पोस्ट गरिएका तस्बिरहरूमा आगो र धुवाँको मुस्लोले भवनलाई घेरिएको देखिन्छ।

आगलागी आइतबार बिहान करिब ३ बजे सुरु भएको बताइन्छ, जब ‘ब्यान्ड एडीएन’ को प्रस्तुति भइरहेको थियो। यस घटनामा करिब १,५०० व्यक्ति सहभागी थिए।

स्थानीय मिडियाका अनुसार, आगलागीको कारण सम्भवतः आतिशबाजीका उपकरणहरू हुन सक्ने अनुमान गरिएको छ।