प्रधानमन्त्री केपी शर्मा ओलीले हिंसालाई ग्लोरिफाई गर्ने र हिंसाको बाजा बजाउने कार्य अझै जारी रहेको भन्दै यसको कारण सोधेका छन्। उनले भने, “द्वन्द्वमा हजारौं अङ्गभङ्ग र टुहुरा भए। त्यसमा मल्हम लगाउनुपर्नेमा किन ग्लोरिफाई गरिरहेका छौँ? यसबाट मुक्त हुनुपर्छ।”
सङ्क्रमणकालीन न्याय सम्बन्धी सम्मेलनमा सम्बोधन गर्दै प्रधानमन्त्री ओलीले पीडितलाई न्याय दिन सकिने र सक्नुपर्छ भनेका थिए। उनले यसकै कारण ऐनहरू पारित गरिएको बताएको छ।
उनले सशस्त्र द्वन्द्वलाई राष्ट्रिय गल्ती भन्दै अब त्यस्तो घटना पुन: नहोस् भन्ने आशा व्यक्त गरे। “अब उप्रान्त त्यसो हुनुहुँदैन,” उनले भने। उनले द्वन्द्वका पीडितहरूको परिपूरणका लागि अन्तर्राष्ट्रिय समुदायको साथ र सहयोगको आवश्यक्तामा जोड दिएका छन्।
प्रधानमन्त्री ओलीले माओवादी केन्द्रका अध्यक्ष प्रचण्डलाई लक्षित गर्दै शान्ति प्रक्रियामा घुसाएका अलग-अलग विषयहरूबारे पनि प्रश्न गरे। “कहाँबाट जोडियो यो? खेतमा पानी लगाउने र बाख्रो किनेको कुरा कहाँबाट जोडियो?” ओलीले प्रचण्डलाई चुनौती दिंदै भने।
प्रधानमन्त्रीले यस्तो किसिमको राजनीतिक बहसमा अल्झिन नहुनेमा जोड दिँदै शान्ति प्रक्रियामा इमानदारीका साथ अघि बढ्न भन्ने आफ्नो प्रतिबद्धता पनि दोहोर्याए।
