बुधबार लिग म्याचेस्टर सिटीको लय तोड्न रियल मड्रिड आशावादी
बुधबार लिग म्याचेस्टर सिटीको लय तोड्न रियल मड्रिड आशावादी
    • Bell Sanchar

    • ३ जेष्ठ २०८०, बुधबार

काठमाडौं ।

बुधबार च्याम्पियन्स लिग सेमिफाइनल दोस्रो लेगमा रियल मड्रिडको सामना गर्नुअघि म्यानचेस्टर सिटीका प्रशिक्षक पेप ग्वार्डिओलाले यस प्रतियोगितामा आफ्नो विरासत असाधारण रहेको बताए ।

सिजनको ट्रेवल उपाधि सम्भावनाका साथ अगाडि बढेको सिटी अहिलेसम्म युरोपियन च्याम्पियन बन्न सकेको छैन । गत मंगलबार पहिलो लेगमा उसले सान्टियागो वर्नबेउमा रियलसँग १–१ को बराबरी खेलेको थियो ।

ग्वार्डिओलाले सन् २००९ र २०११ मा बार्सिलोनाको प्रशिक्षकका रुपमा दुईपल्ट च्याम्पियन्स लिग उपाधि जितेका छन् । ‘म यो चरणमा धेरैपल्ट पुगेको छु,’ उनले भने, ‘मेरो विरासत पहिलेदेखि नै असाधारण छ । मैले खेलाडीलाई पनि यो क्षणको लाभ लिन भनेको छ । हामी यहाँ हुनु नै भाग्यशाली हो ।’

यो प्रतियोगिता हाम्रो हातमा छ । हाम्रो नतिजा हाम्रै प्रदर्शनमा निर्भर छ । हामीले केहि असाधारण गर्नु आवश्यक छैन । बस खेल जित्ने र फाइनलमा पुग्ने,’ खेलअघिको पत्रकार सम्मेलनमा ग्वार्डिओलाले थपे ।

आजको खेलको विजेताले १० जुन, शनिबार इस्तानबुलमा इन्टर मिलानसँग फाइनल खेल्नेछ ।

शहरीय प्रतिस्पर्धी एसी मिलानलाई समग्रमा ३–० गोलअन्तरले पराजित गरी इन्टर मिलान १३ वर्षपछि पहिलोपल्ट युरोपियन च्याम्पियनसिपको फाइनलमा पुगिसकेको छ ।

तथ्यांकविद् ओप्टाले म्यानचेस्टर सिटी फाइनलमा पुग्ने सम्भावना ६९ प्रतिशत रहेको र उपाधि जित्ने सम्भावना ४५ प्रतिशत रहेको प्रक्षेपण गरेको छ ।

पछिल्ला २२ खेलदेखि अपराजित सिटीलाई यही तथ्यांकले उपाधिको प्रमुख दावेदार बनाएको छ ।

ओप्टाका अनुसार कीर्तिमान विस्तार गर्ने गरी रियल मड्रिडले १५औंपल्ट च्याम्पियन्स लिग उपाधि जित्ने सम्भावना १५ प्रतिशतमात्र छ ।

सिटी प्रिमियर लिगको उपाधिबाट एक जित नजिक छ । यो उसका लागि ६ वर्षमा पाँचौं घरेलु उपाधि हुनेछ ।

एफए कप उपाधिका लागि उसले वेम्बलीमा म्यानचेस्टर युनाइटेडसँग खेल्दैछ । उनीहरु सिजनको तीन मुख्य उपाधि जितेर सन् १९९९ मा म्यानचेस्टर युनाइटेडले राखेको ट्रेवल उपाधि कीर्तिमान बराबरी गर्न चाहन्छन् ।

सन् २००८/०९ मा बार्सिलोनाका लागि ट्रेवल उपाधि जितेका ग्वार्डिओलाले दुई वर्षअघि सिटीलाई च्याम्पियन्स लिगको फाइनलमा पुर्याएका थिए ।

तर, उनीहरु चेल्सीसँग पराजित रहे । गत वर्ष सेमिफाइनलमा ९० मिनेटसम्म दुई गोलको अग्रता राखे पनि अतिरिक्त समयसम्म पुगेर रियल मड्रिडसँग ६–५ ले पराजित भएको थियो ।

‘मैले सात वर्षअघि यो क्लबका लागि सम्झौता गरेको हो । उनीहरुले मलाई च्याम्पियन्स लिग जिताउनु भनेका थिएनन् । तर, म र मेरो स्टाफलाई अनुबन्धन गराउनुको मुख्य उद्देश्य त्यही हो भनेर सबैले बुझेका थिए,’ ग्वार्डिओला भन्छन्, ‘तर, निश्चित रुपमा हामीले त्यही एउटा छाडेर अरु सबै उपाधि जित्यौं । हामी च्याम्पियन्स लिग जित्न ब्यग्र छौं ।’

‘मानिसहरुले भनेका छन् कि हामी जितको धेरै नजिक छौं । मेरो विचारमा हामी धेरै टाढा छौं,’ उनले थपे, ‘यहाँ हुनु सपना पूरा भएजस्तै हो ।

भविष्यमा कसैलाई थाहा छैन हामी कहाँ हुन्छौं । त्यसैले एकपल्ट जब हामी यहाँ छौं भने गरौं । हाम्रा समर्थकहरुका लागि गरौं ।’

रियलले लगातार छैटौंपल्ट च्याम्पियन्स लिग नकआउट चरणमा इंग्लिस क्लबसँग खेलिरहेको छ ।

गत सिजन फाइनलमा लिभरपुललाई हराउनुअघि रियलले नकआउट चरणमा चेल्सी र सिटीलाई पराजित गरेको थियो । त्यस्तै यो सिजन पनि उसले यसअघि चेल्सी र लिभरपुललाई हराइसकेको छ ।

सिटीका डिफेण्डर नाथान एके दुवै टिमका गरी एकमात्र अनुपस्थित खेलाडी हुन् । कारबाहीका कारण पहिलो लेग खेल्न नपाएका रियलका मिडफिल्डर एडर मिलिटाओ यो खेलका लागि उपलब्ध छन् ।

रियल मड्रिडका प्रशिक्षक कार्लो एन्सेलोटीले पछिल्लो १० सिजनमा छैटौंपल्ट च्याम्पियन्स लिगमा फाइनलमा पुग्ने क्रममा इत्तेहाद रंगशालामा म्यानचेस्टर सिटीलाई हराउनेमा आफू आशावादी रहेको बताए ।

इटलीका यी प्रशिक्षकले चारपल्ट च्याम्पियन्स लिग उपाधि जितेका छन् । उनले रियलबाट दुई र एसी मिलानबाट दुईपल्ट यो सफलता हासिल गरेका हुन् । आफ्नो कार्यकालमा बुधबार अर्को एक सफलता मिल्नेमा उनी विश्वस्त छन् ।

‘हामी अर्को महत्वपूर्ण सफलताको नजिक छौं । आमी धेरै आशावादी छौं र प्रेरित छौं । भोलिको खेल कठिन हुनेछ तर, हामी कठिन अवस्थामै सबैभन्दा धेरैपल्ट सफल भएका छौं,’ एन्सेलोटी भन्छन्, ‘रणनीति सधैंजस्तै हो । हामी प्रयास गछौं र खेलाडीहरुबाट सम्भव भएसम्म प्रदर्शनको अपेक्षा गर्छु । हामी पहिलो लेगभन्दा अझै राम्रो खेल्न सक्छौं । तर, उनीहरुले पनि सुधार गर्नेछन् ।’

साताकाे चर्चित
सम्बन्धित