काठमाडौं ।
नक्कली भुटानी शरणार्थी प्रकरणलाई लिएर नागरिक आन्दोलनका अगुवाहरुले उपप्रधानमन्त्री एवम् गृहमन्त्री नारायणकाजी श्रेष्ठलाई भेटेका छन् ।
शुक्रबार सिंहदरवारस्थित गृहमन्त्रालयमा उपप्रधानमन्त्री एवम् गृहमन्त्री श्रेष्ठलाई डा.संजीव उप्रेती, केशव सिग्देल, घिमिरे युवराज, शिशिर उप्रेती, रक्षा बम, प्रेम चलाउने, पवन थापा सहितका नागरिक आन्दोलनका अगुवाहरुले भेटेका हुन् ।
जवाफमा उपप्रधानमन्त्री एवम् गृहमन्त्री नारायणकाजी श्रेष्ठले बलियो प्रमाण-अभियोजनसहित मुद्दा परेकोले नक्कली शरणार्थी काण्डका अभियोगीहरू अदालतबाट समेत उम्किन नसक्ने विश्वास व्यक्त गरे ।
उनले शरणार्थी प्रकरण सम्बन्धि थप अनुसन्धानलाई जारी राखिने बताए।
आफूलाई कतिपयले ‘सधै गृहमन्त्री होलास् र, थुनिएकाहरू निस्किदा तेरो के होला ‘ भन्ने गरे पनि बरु शहीदको लाममा मिसिन तयार हुने तर सुशासन र जनसेवाका लागि लडिरहने उपप्रधानमन्त्री श्रेष्ठले बताए ।
ठोस तथ्यप्रमाण बिना अभियोगीले बयानमा पोलेकाहरूसम्म पुग्दा मुद्दा कमजोर बन्ने सम्भावनाप्रति सरकार सजग रहेको समेत उनले बताए।
