काठमाडौं ।
मन्त्रिपरिषद्लाई पूर्णता दिनेबारे छलफल र आवश्यक निर्णय लिन सत्ता साझेदार दलको बैठक आह्वान भएको छ ।
प्रधानमन्त्री निवास बालुवाटारमा मंगलबार अपराह्न ४ बजेका लागि सत्ता साझेदार दलको बैठक आह्वान भएको हो ।
१० दल सम्मिलित उक्त दलको बैठकले मन्त्रिपरिषद्लाई पूर्णता दिनेबारे छलफल गरेर आवश्यक निर्णय लिने प्रधानमन्त्रीका स्वकीय सचिव रमेश मल्लले जानकारी दिए ।
प्रधानमन्त्री प्रचण्डले मन्त्रिपरिषद्लाई पूर्णता दिन निरन्तर छलफल गर्दै आएका छन् । तर, साझेदार दलभित्र सहमति जुटिनसकेकाले ढिलाइ हुँदै आएको छ ।
यसअघि सोमबार बिहान बालुवाटारमै तीन दलका शीर्ष नेताबीच छलफल भएको हो ।
प्रधानमन्त्री प्रचण्डसहित कांग्रेस सभापति शेरबहादुर देउवा, नेकपा एकीकृत समाजवादीका अध्यक्ष माधव नेपालबीच भएको उक्त छलफलमा भागबण्डाबारे मोटामोटी सहमति भएको बताइएको छ।
सोही सहमतिअनुसार आजको बैठकमा छलफल हुने बताइएको छ।