जी–७ समूहले रूसी सुनको आयातमा प्रतिबन्ध लगाउने भएको छ। युक्रेनमाथि युद्ध जारी रखेको रूसलाई कमजोर बनाउने उद्देश्यले जी-७ राष्ट्रले रूसी सुनको आयातमा प्रतिबन्ध लगाउन लागेका हुन्।
‘एकसाथ जी-७ समूहले रूसी सुनको आयातमा प्रतिबन्ध लगाउने विषयमा घोषणा गर्नेछौं,’ अमेरिकी राष्ट्रपति जो बाइडेनले ट्वीटरमा भनेका छन्। जी- ७ समूहका सदस्य राष्ट्रले रूसबाट अर्बौ डलर बराबरको सुन आयात गर्दै आएका छन्।
बेलायती प्रधानमन्त्री बोरिस जोनसनले रुसी सुनमाथिको प्रतिबन्धले ‘रूसी कुलीन वर्गलाई प्रत्यक्ष असर गर्ने र पुटिनको युद्ध मेसिनको मुटुमा प्रहार गर्ने’ टिप्पणी समेत गरेका छन् ।
पुटिनले अर्थहीन र बर्बर युद्धमा आफ्नो घट्दो स्रोतहरू खेर फालिरहेको उनले आरोप लगाए । उनले युक्रेनी र रूसी जनता दुवैको खर्चमा आफ्नो अहंकार प्रदर्शन गरेकोसमेत आरोप लगाए ।
सुरूमा बेलायतले रसियाली सुन आयातमा प्रतिबन्ध लगाएको थियो। यसपछि जी–७ सदस्यहरू क्यानाडा, जापान र संयुक्त राज्य अमेरिकाले यसलाई पछ्याएका हुन्।
जर्मनीमा शिखर सम्मेलन आयोजना गरिरहेको जी–७ समूह अन्तर्गतका अन्य सदस्यले पनि मंगलबार यस बिषयलाई औपचारिकता दिने एक वरिष्ठ अमेरिकी अधिकारीले बताए।
सन् २०२१ मा रूसले १२.६ बिलियन पाउण्ड बराबरको सुनको निर्यात भएको थियो।
अमेरिकी राष्ट्रपति बाइडेनले जी सेभेनका अन्य सदस्य राष्ट्र जर्मनी, फ्रान्स र इटालीलाई पनि प्रतिबन्धमा सामेल हुन सुझाव दिएका छन्।
‘जी–७ समूहले रूसी सुनको आयातमा प्रतिबन्धको घोषणा गर्नेछ । यो रूसको प्रमुख निर्यात हो । रूसले अर्बौं डलर बराबरको सुन निर्यात गर्छ’, प्रतिबन्धबारे अमेरिकी राष्ट्रपति जो बाइडेनले ट्वीटरमा लेखेका थिए।
