काठमाडौं।
बंगालको खाडीमा विकसित न्यूनचापीय प्रणालीको प्रभावले आगामी सातादेखि नेपालका विभिन्न क्षेत्रमा वर्षा हुन सक्ने मौसमविद्हरूले बताएका छन्। मौसम पूर्वानुमानका विभिन्न मोडेलले आगामी मंगलबारदेखि करिब एक सातासम्म वर्षाको सम्भावना देखाएका हुन्।
मौसमविद् डा. विनोद पोखरेलका अनुसार चारवटा मौसम पूर्वानुमान मोडेलको औसत विश्लेषणले देशका केही स्थानमा भारी वर्षासमेत हुन सक्ने संकेत गरेको छ। यद्यपि, कुन क्षेत्रमा कति वर्षा हुन्छ भन्ने विषयमा अहिले नै निश्चित निष्कर्ष निकाल्न कठिन रहेको उनले बताएका छन्।
विभिन्न मौसम मोडेलले वर्षाको स्थान र मात्राबारे फरक–फरक अनुमान गरेकाले आगामी दिनमा पूर्वानुमान परिवर्तन हुन सक्ने सम्भावना छ। त्यसैले मौसमको अवस्थाबारे नियमित रूपमा अद्यावधिक सूचना लिन आवश्यक देखिएको छ।
सम्भावित वर्षालाई ध्यानमा राख्दै धानबाली भित्र्याउने तयारीमा रहेका किसानलाई मौसमको पूर्वानुमानअनुसार कामको योजना बनाउन सुझाव दिइएको छ।
आगामी मंगलबारदेखि धान काट्ने तयारीमा रहेका किसानले सम्भव भएसम्म त्यसअघि नै धान काटेर सुरक्षित स्थानमा भित्र्याउन वा मौसम अनुकूल भएपछि मात्र कटाइ गर्ने गरी तयारी गर्नुपर्ने मौसमविद् पोखरेलको सुझाव छ।
केही स्थानमा असिनासहित वर्षा हुन सक्ने सम्भावना रहेकाले किसानले बालीको सुरक्षामा विशेष ध्यान दिनुपर्ने देखिएको छ। वर्षाका कारण पाकेको धानमा क्षति पुग्न सक्ने भएकाले समयमै सावधानी अपनाउनु महत्त्वपूर्ण हुनेछ।
सम्भावित प्रतिकूल मौसमलाई ध्यानमा राख्दै हिमाली क्षेत्रमा यात्रा तथा पदयात्रा गर्नेहरूलाई पनि सतर्कता अपनाउन सुझाव दिइएको छ। मौसम बिग्रिएमा यात्रा जोखिमपूर्ण बन्न सक्ने भएकाले यात्रामा निस्कनुअघि मौसमको अवस्था बुझ्न र आधिकारिक सूचनालाई आधार बनाउन आवश्यक छ।
मौसम पूर्वानुमानमा आगामी दिनमा फेरबदल हुन सक्ने भएकाले किसान, यात्रु तथा सर्वसाधारणले पछिल्ला मौसम अपडेटमा ध्यान दिँदै आवश्यक सावधानी अपनाउनुपर्नेछ।
