काभ्रे — भुम्लु–५ मा भएको बोलेरो दुर्घटनामा चौरीदेउराली–४ स्थित सरस्वती माध्यमिक विद्यालयका प्रधानाध्यापक कमल श्रेष्ठको मृत्यु भएको छ । श्रेष्ठले चलाएको बा२१च ९२१० नम्बरको बोलेरो भुम्लुको सल्लेस्थित कालोभीरमा दुर्घटना भएको थियो ।दोलालघाटबाट कुखुराको दाना, टीभी, फ्रिजलगायतका सामान बोकेर गएको बोलेरो बुधबार दिउँसो ३ बजेतिर दुर्घटना भएको हो । चालक दसैं बिदामा घर गएका कारण सवारी धनी श्रेष्ठले सो दिन आफैं सामान गाउँ लैजाँदै थिए । श्रेष्ठबाहेक अरू सवार नभएको र दुर्घटना स्थल खोंचमा भएकाले अरूले ढिला थाहा पाएका थिए । उपचारका लागि धुलिखेल अस्पताल ल्याइएका उनको बिहीबार बिहान १ बजे मृत्यु भएको प्रहरी निरीक्षक अनिश बुढाथोकीले जानकारी दिए ।