काठमाडौं । प्रधानन्यायाधीश चोलेन्द्रशमशेर जबराको राजीनामा माग्दै आज सर्वोच्च अदालतको मूल गेट ‘कब्जा’ गरिएको छ । नेपाल बार एसोसिएसनको आह्वानमा भएको आन्दोलनका क्रममा कानुन व्यवसायीले सर्वोच्चको मूल गेटमा धर्ना दिएका हुन् ।
प्रधानन्यायाधीशलाई सर्वोच्च प्रवेशमा रोक लगाउन मूल गेटमै धर्ना दिइएको हो । ठूलो संख्यामा कानुन व्यवसायी धर्नामा बसेका छन् ।
त्यस क्रममा नेपाल बारका पदाधिकारीले प्रधानन्यायाधीश जबराले पदबाट राजीनामा नदिए उनका ‘कर्तुतहरू’ संयुक्त राष्ट्रसंघसम्म पुर्याउने चेतावनी समेत दिएका छन् ।
सर्वोच्च अदालतबाहिर ठूलो संख्यामा सुरक्षाकर्मी तैनाथ गरिएको छ ।
पछिल्लो समय विभिन्न प्रकरणमा प्रधानन्यायाधीश जबराको नाम मुछिएको र त्यसले न्यायालयलाई क्षति गर्ने भन्दै बारले उनको बहिर्गमनको माग गरेको हो । उता, न्यायाधीशहरू पनि प्रधानन्यायाधीशको विरोधमा छन् ।
